Konduktor nga nag-selpon nadasmagan; laing 2 angol

Nalagpot ang usa ka konduktor sa jeep dihang nabanggaan sa usa ka delivery rider samtang nilabang nga nag-selpon sa may national highway sa Barangay Mambaling, Dakbayan sa Sugbo, pasado alas 3 sa kadlawon sa Sabado, Mayo 17, 2025.

Nailhan ang biktima nga si Joe Elorde Igot Jr., 33-anyos, nga lumulupyo sa Abellana St., Barangay Suba, Cebu City samtang ang nakabangga giila sa alyas nga Jerome, 30 anyos nga taga Lungsod sa Minglanilla.

Subay sa imbestigasyon, dunay pasahero nga babaye si Jerome padulong sa amihanan’g bahin sa dakbayan apan kalit lang nga nilabang ang usa ka lalaki nga giingon’g naggunit sa iyang selpon ug dihang gibusinahan kini sa drayber wala makabantay hinungdan nadasmagan.

“Nikalit siyag labang niya sige kog busina niya wala man kadungog kay morag ga cellphone pud siya,” matod ni Jerome.

Tungod sa kakusog sa impact, nangalagpot ang mga nalambigit, lakip na ang angkas nga babaye nga miresulta sa ilang pagkaangol.

Gidala sa duol nga tambalanan ang mga biktima tungod sa mga bun-og ug pangos nga ilang naangkon. / JDG