Kings, Bolts mosuway’g sud sa top 8

Mga duwa karon:

5:00 pm- NorthPort batok TNT

7:30 pm- Ginebra batok Meralco

Pahugtan og suway sa Brgy. Ginebra Gin Kings ang ilang paggunit og puwesto sa Top 4 sa ilang pagpakigsangka sa Meralco Bolts sa main game karong Biyernes sa gabii, Mayo 30, 2025, sa Philippine Basketball Association (PBA) Season 49 Philippine Cup sa Smart Arenata Coliseum.

Ang Gin Kings kasamtangang naa sa ikaupat nga luna dala ang 5-2 nga rekord apan taliwala niini, wala pa sila nakaseguro og luna sa quarter-finals ning puntoha. Aron makaseguro og puwesto sa quarter-finals, kinahanglan pa nga makadugang og usa ka daog ang Gin Kings.

Dili na hinuon kini tantong lisod alang sa Gin Kings gumikan kay aduna pa man sila’y nahabiling upat ka mga duwa apil ning sangkaa sa elimination round.

Apan dili angayang mokampante ang Gin Kings tungod kay taas pa ang ilang tahakon aron makaselyo og luna sa Top 4, nga nagtangag og twice-to-beat nga bintaha sa quarter-finals.

Sa ilang bahin, ang Bolts kasamtangang naa sa ikawalo nga puwesto bitbit ang 5-5 nga rekord ug labaw nga wala pa sab sila nakaseguro og puwesto quarter-finals.

Kinahanglang modaog ang Bolts ning sangkaa aron hingpit nga makasulod sa quarter-finals ug kinahanglan kini nilang mahimo ning higayuna tungod kay mao kini ang katapusan nilang duwa sa elimination round.

Kon mapilde ang Bolts, hayan wala na sila’y kontrol sa sitwasyon ug mag-agad na lang sila kon unsa’y resulta sa ubang nahabiling mga duwa sa elimination round kabahin sa kon unsa’y ilang dangatan.

Sa premirong duwa, ang Grandslam-seeking TNT Tropang Giga makigbatok sa nagsalimoang nga NorthPort Batang Pier.

Ang Tropang Giga naa sa ikapitong puwesto dala ang 4-3 nga rekord ug dako pang buhi ang ilang paglaom alang sa ilang gitinguha nga Grandslam title.

Sa ilang bahin, ang Batang Pier naa sa ika-10 nga puwesto dala ang 1-6 nga rekord ug usa sa mga kandidato sa sayong mga manamilit. / ESL