Kinatalged ken kinatalna bayat ti panawen ti panangipila iti kandidatura iti siudad ti Baguio, maipanpannakkel
Ben Madilynn
Ipanpannakkel ti siudad ti Baguio nu panawen ti panangipila iti kandidatura ken eleksyon ket ti kinakapia ken kinaawan ti anyaman a dinnangran iti nagbaetan dagiti tumartaray a kandidato, ngem kasapulan latta ti pammaneknek ken kasiguraduan manipod kadagiti kandidato nga agbalin a natalna ti kampanyada agingga inton eleksyon.
Dayta ti rason nu apay kasapulanda nga agsapata kalpasan a maipila ken maalada ti Certificate of Candidacy-da.
Sigun kenni Atty John Paul Martin, Election Officer ti Commission on Election-Baguio, namnamaenna met a tungpalen dagiti kandidato dagiti insapatada.
Mainaig iti daytoy, ti maysa kadagiti baru a nilaun ti panagsapata dagiti kandidato ket ti saan a panagaramat ti social media ken artificial intelligence iti panangiwaras ti misinformation, disinformation ken malinformation a maysa kadagiti kayat a lapdan ti COMELEC bayat ti campaign period.
Gapu iti dayta, nakasagana ti committee ti COMELEC tapno ikkaten dagitoy a maipabpablaak iti social media.
Impasigurado pay ni Atty. Martin a mapatawan ti usto a pannusa dagiti aglabsing iti daytoy, saan laeng a dagiti kandidato ken dagiti supporters nu di ketdi pakairamanan dagiti media entities a mangiwaras kadagiti malicious post iti social media.
