Ben Madilynn
DEAD on the spot ang duha ka mga babaye samtang pito sa ilang mga kaubanan ang angol human nga naigo og kilat.
Ang insidente nahitabo ala 1 sa hapon, Martes, Septyembre 10, 2024, sa Sitio Mawato, Barangay Bantol, Marilog District, Davao City.
Sa report gikan sa Davao City Police Office (DCPO), ang duha ka mga namatay nailhang sila Emma Bansilan, 49-anyos ug Nenita Noa, 53-anyos, pulos mga residente sa Barangay Bantol sa maong distrito sa Davao.
Nasayran nga grabeng nasamdan ang usa ka Arlyn Dalagma, 49-anyos, samtang nakaangkon og mga minor injuries sila Lito Ansang, 60-anyos, Jerry Ogaw, 44-anyos, Rowena Larisa, 46-anyos, Joel Ansang 30-anyos, Noeme Altubar 58-anyos ug Mila Monoy, 20-anyos.
Dugang nasayran nga nang-harvest og humay ang mga biktima sa dihang kalit mibundak ang kusog nga ulan.
Dali nga nagpasilong ang mga nahisgutan sa payag ni Lito Genado sa dihang mikilat og kusog ug naigo ang mga biktima.
Nangahagba ang mga biktima diin ang duha kanila, dead on the spot, samtang ang mga kaubanan nasamdan kinsa daling gipangdala sa Southern Philippines Medical Center (SPMC). (JPC)
