Kikiam

○ Mga sagol:

○ Set A (Meat Mixture):

½ kg. sa ginaling nga baboy, dunay 20% nga tambok

½ nga kutsarita sa asin

1 ka kutsara sa asukar

2 ka kutsara sa oyster sauce

½ kutsarita sa black pepper

1 ka kutsara sa Chinese five-spice powder

1 ka buok itlog

4 ka kutsara sa cornstarch

½ tasa sa pasayan, gipanitan, gikuhaan sa sulod ug gihiwa’g pino

○ Set B (Mga utanon):

½ tasa sa carrot, gihiwa

1 ka tasa sa radish, gihiwa

2 ka buok shiitake mushroom, gibasa sa tubig, gihiwa

1 ka kutsara sa spring onions, gitadtad

○ Set C:

3 ka buok bean curd sheets o tofu skin

Slurry (cornstarch ug tubig)

Canola oil, pangprito

○ Set D (Sauce):

1 ka tasa sa tubig

2 ka kutsara sa oyster sauce

1 ka kutsara sa soy sauce

1 ka kutsara sa banana ketchup

2 ka kutsara sa asukar

1 ka kutsara sa suka

2 ka kutsara sa cornstarch

Black pepper, pangtempla

1 ka kutsara sa vegetable oil o sesame oil

○ Unsay buhaton:

1. Templahi ang ginaling nga baboy og asin, asukar, oyster sauce, black pepper ug five-spice powder. Idugang ang itlog ug cornstarch. Ukaya hangtod nga maayo na ang pagkasagol.

2. Paniti ug limpyuhi ang sulod sa pasayan ug hiwaa og gagmay. Ibutang kini sa gina­ling. Sagula, unya idugang ang carrots, radish, shii­take mush­rooms, ug spring onions. Sagula.

3. Ibutang ang panit sa tofu sa flat nga surface. Paghimo og slurry kun pangpalapot pinaagi sa pagsagol sa cornstarch ug tubig. Pagkuha og igong gidaghanon sa ginaling nga baboy, ibutang sa tunga sa panit sa tofu, i-roll, i-brush ang slurry sa mga kilid, unya ang nahuman na ipaligid og tarong.

4. Pag-brush sa steamer og mantika. I-arrange ang rolls sa steamer. Tabuni ug pasagdahi nga maluto sulod sa 20 minutos. Kon steamed na, ipadaplin ug pabugnawa.

5. Sa usa ka kaldero, ibutang ang tubig, soy sauce, oyster sauce, banana ketchup, suka, asukar, ug cornstarch. Sagula hangtod mahilis ang tanan. Lutoa hangtod molapot. Tiwasa pinaagi sa black pepper ug mantika.

6. Sa usa ka kaha, inita ang mantika. Prituha ang Kikiam hangtod nga mokagumkom ug mag golden-brown. Seguraduha nga pasagdan una kini sa di pa hiwaon nga diagonal.