Kawatan natultolan pinaagi sa GPS

Nabalhog sa Mabolo Police Station ang 26 anyos nga lalaki kinsa gitudlo nga maoy nikuot sa high end cellphone sa usa ka kawani sa IT Park, Barangay Apas, Cebu City niadtong alas 10:30 sa gabii, Sabado, Hunyo 7, 2025.

Ang maong kawatan nga gitago sa pangalang Rey, taga Belgium St., Barangay Suba, Cebu City, nakuha sa iyang posisyon ang iPhone 16 Promax nga mokantidad sa P93,000 nga gipanag-iya ni Cedie, 37, nga taga Tungkil, Lungsod sa Minglanilla.

Sa imbestigasyon sa Mabolo Police Station nga samtang naglakaw ang biktima sa IT Park samtang nangita og kan-anan, wala siya makabantay nga gikuot ang iyang cellphone diha sa iyang sling bag.

Namatikdan na lang niya nga nawala na ang iyang mahalon nga cellphone hinungdan nga nagpatabang sa duha ka mga sakop sa Mobile Patrol Unit nga nagpatrolya sa maong lugar.

Sa gihimong follow up operation sa Mabolo Police Station, nasubay nila ang GPS sa maong cellular phone nga anaa Gochan Street eskina Leon Kilat, Barangay Kalubihan, Dakbayan sa Sugbo.

Dali nga niadto ang mga polis uban sa biktima ala 1:00 sa hapon, Dominggo, Hunyo 8, 2025, ug ilang naabtan ang suspek nga nagbitbit pa sa mahalon nga cellphone ug positibong giila sa tag-iya.

Hinuon giangkon sa suspek nga napugos siya sa pagpanguot gumikan sa kawad-on ug iya na unta nga ibaligya sa Colon.

Kasong pagpangawat ang atubangong kaso ni Rey bisan pa man nga nangayo siya og pasaylo sa biktima. / AYB