Katakos sa youth gibaid

BAG-OHAY lang ang Department of Labor and Employment–Davao Region (DOLE-Davao) nagbansay sa 450 ka mga benepisyaryong kabatan-onan ilawom sa Special Program for Employment of Students (Spes) pinaagi sa serye sa “soft skills training sessions” nga gipahigayon sa tibuok probinsiya.

Ang mga sesyon, gilusad niadtong Mayo 6 ug 13, 2025, gisalmotan og 456 ka partisipante. Ang pagbansay gipahigayon sa pakig-alayon uban ang Public Employment Service Offices (Pesos), Job Placement Offices (JPOs), ug mga pribadong mga sektor.

“These sessions were designed to prepare them for real-world work environments and empower them with the confidence and values needed for future employment,” matud sa DOLE-Davao.

Ang workshops gilangkuban sa mga topiko sama sa “self-confidence, workplace etiquette, time and stress management, financial literacy, teamwork, and professional ethics.”

Si Alchin Mae L. Avenido, 20-anyos nga estudyante sa kolehiyo gikan sa Tagum City, niangkon nga wala siya nasayod kung unsay mahitabo sa pagsalmot niini. Apan sa paghuman sa pagbansay, matud niya nga ang kasinatian nagbilin og impak nga way kahumanan.

“We were taught workplace etiquette and got a glimpse of the reality of public service work. I’m truly grateful for this experience. The knowledge, values, and confidence I gained during my SPES journey went far beyond what I imagined,” tug-an niya.

Gipahimug-tan sa DOLE-Davao nga ang pagbansay nagtabang sa mga nisalmot di lang sa ilang mga tahas apan ang kinauyokan nga tumong luyo sa professional conduct sa mga gitrabahoan. Ang ahensiya naghulagway sa inisyatibo isip long-term investment sa pagmugna og kapasidad ug “value-driven workforce”.

Ang Spes naghatag og temporaryong panarbaho ngadto sa mga dunay katakos nga tinun-an ug sa out-of-school youth gikan sa low-income nga mga pamilya, nga nagtabang kanila nga mokita og salapi alang sa galastuhan sa eskuwelahan – ilabi na sa panahon sa summer ug holiday breaks.

Pinaagi niining pagbansay, subling nagpadayag ang DOLE-sa ilang komitment nga momugna dili lang mga oportunidad sa trabaho alang sa kabatan-onan apan pagpagahum sab kanila og abilidad aron nga makasugakod sa pagpanarbaho ning panahona. (Rojean Grace G. Patumbon)