Kasong terorismo nga way piyansa batok sa lalaking nanghulga

Way piyansa ang kasong terorismo nga giatubang niadtong 30 anyos nga nanghulga diha sa online nga ipapatay ang usa ka dakong opisyal sa gobiyerno ug bombahan ang mga buhatan sa Commission on Elections (Comelec).

Si Gian Carlo Dela Cruz Maningo nasikop niadtong Mayo 14, 2025, sa iyang pinuy-anan sa Barangay Casili, Mandaue City, duha ka adlaw human ang mga awtoridad nakasubay kaniya pinaagi sa imbestigasyon.

Sa duha ka pahina nga report sa korte nga gipadala sa SunStar Cebu Miyerkules, Mayo 28, base sa mga dokumento pinetsahan og Mayo 26, ang akusado gikiha og kalapasan sa Section 4 sa Republic Act No. 11479, o ang Anti-Terrorism Act of 2020, in relation to Republic Act No. 10175, ang Cybercrime Prevention Act. 

Ang kaso gisang-at sa Regional Trial Court sa Mandaue City.

Basi sa charge sheet, ang akusado nipublikar sa Facebook post nga nagtanyag og P10 milyunes nga reward aron patyon ang “most wanted terrorists” nga giila sa iyang post nga si Comelec Commissioner George Erwin Garcia, Gobernador Gwendolyn Garcia, Mayor Raymond Garcia, ug ang ginganlan og Christine Garcia. 

Sa iyang post nagtanyag sab siya og P5 milyunes nga reward sa makapaulbo sa mga buhatan sa Comelec.

“10 Million Reward. Will be offering a reward to whom-ever can kill the following MOST WANTED TERRORIST. George Garcia, Christine Garcia, Raymond Garcia and 5 Million reward to BOMB all Comelec site,” sumala sa iyang post.

Sa post giapil ang mga hulagway sa nahisgutang mga opisyal nga nakakuha og daghang interaction sa publiko sama sa shares ug comments nga gihulagway sa mga awtoridad  nga nakamugna og “an atmosphere or spread a message of fear.”

Sa certification gikan sa Office of the City Prosecutor, si Deputy City Prosecutor Sarah Vanessa Lacno-Tudtud nagkanayon nga ang akusado gipahibalo sa mga ebidensiya nga gipresentar batok niya, ni-waived sa preliminary investigation, ug anaa ang mga prima facie evidence nga makapakumbikto.

Si Assistant City Prosecutor Russell Busico nga maoy nipirma sa kaso nitumbok nga sa gihimo sa akusado nga pagpanghulga gamit ang  information ug communication technology, kini nasubay sa cybercrime law in relation sa kalapasan sa terorismo.

Ang akusado kasamtangan  nga gitanggong sa NBI Central Visayas office ug i-turnover ngadto sa Mandaue City Jail. / CAV