Ben Madilynn
Nasikop sa gipahigayong buy-bust ang usa ka 25-anyos nga lalaki niadtong Lunes, Hunyo 2, 2025, sa Sitio Lomboy, Barangay Mambaling, Dakbayan sa Sugbo ug nakuhaan og P408,000 nga kantidad sa gituohang shabu.
Ang operasyon gihimo sa hiniusang pwersa sa Philippine Drug Enforcement Agency (PDEA) 7, inabagan sa PNP Drug Enforcement Group/Special Operations Unit 7 ug Cebu City Police Office, pasado alas 8:00 sa gabii.
Giila ang dinakpan nga si alyas John, residente sa Barangay Lawaan III, Dakbayan sa Talisay.
Nakuha gikan kaniya ang tulo ka pakete sa gituohang shabu nga motimbang og gibanabana nga 60 gramos apil ang buy-bust money.
Matod ni Leia Alcantara, information officer sa PDEA 7 nga duha ka semana nilang gipanid-an ang suspek human makadawat og impormasyon gikan sa mga residente sa dapit.
Base sa ilang nakuhang kasayuran, si alyas John makabaligya og 30 ngadto sa 50 gramos nga shabu matag semana.
Ang mga nakuhang ebidensya gipadala na sa PDEA 7 Regional Office Laboratory alang sa tukmang disposisyon. / AYB
Source: Kapin sa P400K nga shabu nasakmit atol sa buy-bust
