Kanhi Pres. Duterte, Sen. Bong Go gikiha

Si kanhi senador Antonio Trillanes IV mipasaka og kasong plunder batok kanila ni kanhi Presidente Rodrigo Duterte ug Senador Bong Go atubangan sa Department of Justice sa Biyernes sa buntag, Hulyo 5, 2024

Si Trillanes nipasangil nga sila si Duterte ug Go maoy nagpaluyo sa “anomalous” nga paghatag sa 184 ka mga proyekto sa gobyerno nga mobalor og P6.6 bilyunes ngadto sa mga kompaniya nga gipanag-iya sa amahan ug igsuon ni Senador Go gikan sa 2007 hangtod 2018.

Ang awarding, matod niya, nahitabo bisan pa sa kakuwang sa gikinahanglang lisensya sa mga kontraktor sa paghimo sa mga dagkong proyekto.

“All the elements of plunder are clearly present in this case. Mr. Bong Go, in conspiracy with Mr. Duterte, used his position, authority and influence to corner billions worth of government projects in favor of his father and brother, thus unduly enriching himself and the members of his immediate family. The evidence presented in the complaint is compelling and warrants a plunder charge,” matod ni Trillanes.

Gawas sa plunder, mag-atubang usab sila si Duterte ug Go og mga kasong graft tungod sa giingong paglapas sa Republic Act 3019 o ang Anti-Graft and Corrupt Practices Act, ug Republic Act 6713, o ang Code of Conduct and Ethical Standards for Public Officials and Employees.

Ubos sa balaod sa Pilipinas, ang plunder nahimo kon ang usa ka opisyal sa gobyerno nakakuha og ill-gotten wealth nga P50 milyunes o labaw pa gikan sa pundo sa gobyerno pinaagi sa mga mga buhat sa pangurakot inubanan sa pamilya o mga kauban.

Masilutan kini sa tibuok kinabuhi nga pagkabilanggo.

Ang gobyerno mahimo usab nga mosakmit sa ilegal nga nakuha nga bahandi o mga kabtangan human sa usa ka kombiksyon.

Ang reklamo gibase sa September 6, 2018, report sa Philippine Center for Investigative Journalism (PCIJ), nga nag-ingon nga ang CLTG Builders gihatagan og 125 ka mga kontrata sa gobyerno nga nagkantidad og P4.6 bilyunes gikan sa 2007, sa dihang si Duterte pa ang mayor sa Davao, ngadto sa 2017, dihang nahimo siyang presidente.

Sila si Duterte ug Go wa pa mopagawas sa ilang mga pamahayag bahin sa sumbong sa pagsuwat ning taho. / Jover Vencio, UP Tacloban intern, REV