Kanhi mayor sa selda sa bilanggoan, nadakpan kini og balik

Kanhi mayor sa selda ang nabalik sa bilanggoan human madakpan sa buy-bust sa Labangon Police Station sa dan A. Lopez, Barangay Labangon, dakbayan sa Sugbo alas 9:58 sa gabii, Huwebes, Agusto 29, 2024.

Ang suspek giila nga si Reynaldo Repaso Cabatino alyas Ekot, 54, taga Sitio Micabaja, Barangay Duljo Fatima, dakbayan sa Sugbo.

Nakuha sa mga operatiba ang usa ka green pouch nga dunay sulod nga pito ka mga pakete sa gituohang shabu nga motimbang sa 20.2 gramos nga dunay standard drug price nga P137,360.

Matod ni Police Major Eraño Regidor, hepe sa Labangon Police Station, nga nadakpan na kaniadto sa illegal nga drugas si Cabatino ug nahimong mayor sa selda sa Cebu City Jail (CCJ).

Human makagawas sa bilanggoan, na-monitor sa kapulisan nga nalambigit na usab kini sa ilegal nga kalihukan sama sa pagpamaligya sa illegal nga drugas. Tungod niini, gilusad dayon ang operas­yon batok sa suspek. / AYB