K to 12 program, saan nga epektibo ken saanna a nasolusyonan ti employability issues iti pagilian – NPTA

LAOAG CITY – Dinillaw ni National Parents-Teachers Association President Willy Rodriguez ti K to 12 curriculum gapu ta saan a nagbalin nga epektibo.

Dinayaw met ni Rodriguez ni Presidente Ferdinand “Bongbong” Marcos Jr. iti panangibilin na a pagbalinen a simple ti agdama nga education curriculum.

Inpalgak ni Rodriguez a napintas ti nagbalin a desisyon ti presidente gapu ta ti K to 12 ket nadisenyo a para Overseas Filipino Worker isut gapuna a kasayaatan no isubli ti K to 10.

Inpetteng na pay a ti K to 12 ket awan pulos ti naitulong ken pakairanudan dagiti agad-adal iti pagilian.

Immunan nga inrakurak ni Presidente Marcos a saan nga inpangato ti nasao a curriculum ti employability dagiti estudyante.

Nagserbi laeng ti K to 12 program a lapped kadagiti estudyante ken nagannak kangrunaan na ket kaadoan dagiti senior high graduates ket nagtalinaed nga unemployed.

Innayon ni Rodriguez a dagiti kompanya ket saan nga agaw-awat kadagiti nagturpos laeng ti senior high school  no di ket dagiti paylaeng nagturpos iti kolehiyo ti iprayoridad da.

Immunan nga inbatad ni Marcos a pagsarsaritaan da ken ni incoming Education Secretary Sonny Angara ti sitwasyon yi employment dagiti nagturpos ti panagadal.

Iti agdama ket manarimaan ti panangtingiting ti Department of Education dagiti curriculum a mangparnuay ti ad-ado a job-ready ken responsable a senior high graduates.