Jonas Cortes mipiyansa

Nipiyansa si Mandaue City Mayor Jonas Cortes human siya pasakahi og kaso sa Office of the Ombudsman tungod sa giingong kalapasan sa Anti-Graft and Corrupt Practices Act.

Ang kaso naggikan sa reklamo nga gisang-at sa Ombudsman ni Ines Corbo Necesario ug Julita Narte batok kang Cortes nga gipasanginlang nakalapas sa Sections 3(e) ug (f) sa Republic Act No. 3019, o ang Anti-Graft and Corrupt Practices Act.

Sa mosyon nga gipetsahan og Mayo 27, 2025, si Cortes pinaagi sa iyang abogado, nihangyo sa Regional Trial Court sa Mandaue City nga tugotan siya nga makapiyansa “isip usa ka katungod.”

Sayo niini, ang Ombudsman nakakita og probable cause aron pasakahan og kaso si Cortes base sa resolusyon nga gipetsahan og Septiyembre 26, 2024, nga gipamatud-an sa usa ka order nga giisyu kaniadtong Nobiyembre 11, 2024.

Human niini, ang Ombudsman nipasaka og impormasyon niadtong Septiyembre 26, 2024, nga nagrekomendar og piyansa nga P90,000.

“For the purpose of judicial expediency and in due deference to the legal processes, the accused Cortes hereby submits himself to the jurisdiction of the Honorable

Court for the purpose of posting his bond,” nagkanayon ang mosyon.

Gikutlo ni Cortes ang Section 4, Rule 114 sa Revised Rules of Criminal Procedure, nga naghatag sa katungod sa usa ka akusado nga makapiyansa sa mga kaso nga mapiyansahan.

Gikutlo sab sa mosyon ang Section 17 sa mao gihapong lagda nga ang usa ka akusado mahimong makapiyansa sa bisan asa nga korte, bisan asa pa isumiter ang impormasyon.

“In sum, the accused Cortes is entitled to bail as a matter of right,” mabasa sa mosyon. / CAV