ITCZ nihasol 2 munisipyo sa Davao Occidental

b20f-itcz.jpg

NAKASINATI ang mga munisipyo sa Jose Abad Santos ug Don Marcelino sa Davao Occidental og mga pagdahili sa yuta ug pagbaha tungod sa Intertropical Convergence Zone (ITCZ).

Subay sa Facebook page sa Municipal Disaster Risk Reduction and Management Office (MDRRMO) sa Don Marcelino, ang dalan sa Saladoc, Barangay Kinanga kasamtangan nga di maagian tungod sa nahitabong pagdahili sa yuta tungod sa way puas nga pag-ulan dala sa ITCZ. Ang Municipal Engineering Office (MEO) naglusad og clearing operations aron nga maagian na ang dalan sa mga behikulo.

“Pasensya sa kalangan, ug daghang salamat sa inyong pagsabot samtang ginapadayon ang pag-ayo sa maong dalan,” matud pa sa pahayag sa MDRRMO.

Niadtong Mayo 18, daghang mga dalan sa munisipyo di na maagian, apil na sa Sitio Kawayan, Kiobog, ug mga provincial roads sa Lower Kepiya, Barangay Lawa, tungod sa pagbundak sa kusog nga ulan. Ang kusog nga ulan maoy hinungdan sa pagbaha nga nakadanyos sa mga dalan ug di na maagian sa tanang matang sa sakyanan. Niabiso ang MDRRMO ngadto sa mga drayber ug motorista nga mangita og laing alternatibo nga mga ruta.

Samtang nahitabo sab ang pagdahili sa yuta sa Kyuled, Barangay Culanan niadtong Mayo 18, 2025, apan ang dalan nalimpyohan na ug maagian na karon sukad Mayo 19, 2025. Dugang pa, ang Lawayon Bridge nahugna sab, apan mga behikulo mahimo pang makalabang agi sa alternatibo nga dalan sa tuong bahin sa suba.

Ang Rainfall Advisory No. 1 nga gipagawas sa Office of Civil Defense–Davao Region (OCD-Davao), nagkanayon nga hinay ngadto sa kasarangan nga mga ulan ang gilauman sa New Bataan, Maragusan, Pantukan, Laak, ug Compostela sa Davao de Oro; apil na ang Tagum City, Santo Tomas, New Corella, Asuncion, ug San Isidro sa Davao del Norte.

Kasarangan hangtud sa panagsang kusog nga ulan gilauman nga makaapekto sa Nabunturan, Mawab, Maco, Mabini, ug Montevista sa Davao de Oro.

“The public and the Disaster Risk Reduction and Management Offices concerned are advised to monitor the weather condition and watch for the next warning to be issued at 5 pm today,” abiso sa OCD-Davao sa ilang Facebook post. (Rojean Grace G. Patumbon)