Ben Madilynn
Binomba ti Israel ti central district ti Beirut, Lebanon a nakatayan ti innem a tattao.
Malaksid iti pimmusay, impadamag pay dagiti Lebanese health officials a pito a tattao ti nasugatan iti panangraut.
Sigun iti Israel, nangisayangkat da iti precise airstrike iti kabesera ti Lebanon ken pinuntiriada ti maysa a pasdek iti distrito ti Bachoura asideg ti parlamento.
Daytoy ti kaasitgan a tinamaan ti airstrike ti Israel idiay central downtown district ti Beirut.
Tallo met a missiles ti timmama iti southern suburb ti Dahiyeh, nga agserserbi a headquarter ti Hezbollah iti makin-abagatan a Beirut nun sadiay ket napapatay ti lider ti Hezbollah a ni Hassan Nasrallah idi napan a lawas ken naguni met dagiti napipigsa a panagbettak.
Iti makin-abagatan a paset ti Lebanon, namakdaar ti militar ti Israel idi agsapa ti Huebes nga agtultuloy ti panangrautda iti eroplano.
Maipalagip a rinugian ti Israel ti ground invasion iti abagatan a Lebanon ita a lawas ken pinasingkedanda idi Miyerkoles a walo kadagiti soldadoda ti napapatay iti uneg ti Lebanon.
Ti ground invasion ken air strike ti Israel idiay Lebanon ket dagos a simmaruno kalpasan iti panangipaputok ti Iran iti barrage of missiles agturong ti Israel kas panagibales kadagiti air strikes ti Israel iti southern suburb a nakatayan ti lider ti militante a grupo nga Hezbollah.
