Imbestigasyon sa kamatayon sa SK chairman sa Pinamungajan

Mohimo og lawom nga imbestigasyon ang Pinamungajan Police Station labot sa kamatayon sa Sangguniang Kabataan chairman sa Barangay Sacsac sa maong lungsod alas 7 sa buntag niadtong Huwebes, Mayo 22, 2025.

Matod ni Police Major Gilfred Baroman, ang hepe sa Pinamungajan Police Station, nga sa pagkakaron dili pa nila makuhaan og pamahayag ang kabanay sa biktima tungod kay naa pa sila sa pagbangutan.

Una nang nadiskobrehan ang 22 anyos nga biktima nga naglisud sa pag ginhawa human giingon’g miinom og toilet bowl cleaner.

Dali kini nga gidala sa Pinamungajan District Hospital apan gideklara kini sa attending physician nga si Dr. Darius Libre nga dead on arrival alas 7:37 sa buntag.

“With due respect lang pud sa family sa victim dili pa gyud sila kahatag og statement karong mga panahona tungod kay nagbangutan pa pud sila sa kalit nga kamatayon, amo rapud nga girespeto,” matod ni Baroman.

Gidugang ni Baroman nga ang ig-agaw sa biktima nga nahinabi sa mga imbestigador mitug-an nga niadtong miaging adlaw nag-post sa iyang Facebook account ang biktima nga naguol kini.

Wala hinuon silay nakitang foul play sa maong kamatayon atol sa imbestigasyon apan iyang giawhag ang pamilya nga aron pagwagtang sa mga pagduda labing maayo nga ipaubos sa autopsy ang patay’ng lawas niini.

“Wala ta mo discount sa possibility nga walay foul play, in fact sige man ang amoang coordination from time to time unya ang investigator on case nakig-coordinate pud sa family, unya aside from that naghatag napud mi og advise sa pamilya nga para ma-erase ang doubt atung ipa undergo og autopsy examination,” matod ni Baroman. / AYB