Ilocos Sur Disaster Risk Reduction and Management Council, mangisayangkat iti pre disaster risk assessment kagiddan ti bagyo Gener
Mario Bautista
Mangisayangkat ti Ilocos Sur Disaster Risk Reduction and Management Council iti pre disaster risk assessment kas panagsagana iti bagyo Gener agsipud ta naibayog ti probinsia iti Signal no 1.
Iti pannaki-uman ti Bombo Radyo Vigan ken ni Rhon Arquelada, babaen iti maaramid a pre-disaster assessment ket maplano no ania dagiti agbalin a tignayda kagiddan ti bagyo.
Nakasagana metten dagiti rescue team nga agresponde kadagiti lugar nga agkasapulan iti tulong.
Malaksid dayta, agtultuloy ti information dissemination da iti publiko tapno mapakaamoan dagiti umili no ania ti sasaadenen ti panawen.
Nupay kasta, balakad ni Arquelada iti publiko nga imonitorda latta ti sasaaden ti panawen ket ugalienda ti agridam ken agsagana.
Iti agdama, naka-white alert status pay laeng ti probinsia ngem manamanama nga agbalinton a red alert.
