Ben Madilynn
PATAY na nga nakaplagan ang igsuon sa kandidato sa konsehal alas 10:00 sa buntag, Sabado, Enero 25, 2025, sa Datu Paglas, Maguindanao del Sur.
Giila ang biktima nga mao si Jimmy Sagan Ebus o alyas Poy, 45-anyos, minyo ug nagpuyo sa Barangay Upper Siling, Buluan, Maguindanao del Sur.
Gibutyag ni Maguindanao del Sur Police Provincial Office Director Police Colonel Ryan Bobby Paloma nga nakadawat og taho gikan sa mga sibilyan ang Datu Paglas Municipal Police Station sa patay nga lawas sa tawo nga nakaplagan sa Sitio Kulumpang, Barangay Alip, Datu Paglas.
Nagresponde dayon ang mga pulis ug positibo ang gipaabot nga impormasyon sa mga sibilyan.
Ang patay nga lawas sa biktima giputos sa trapal, gikapos ang tiil ug kamot.
Nakaangkon kini og mga samad pinusilan sa nagkadaiyang parte sa lawas nga maoy hinungdan sa iyang kamatayon.
Nasayran nga ang biktima maoy igsuon sa midagan sa pagka-municipal councilor sa Buluan.
Gipalawman pa sa kapulisan sa Datu Paglas Municipal Police Station ang imbestigasyon sa pagpatay sa biktima nga gilabay lang sa naasoy nga dapit. (Edgar E. Fuerzas)
