‘Hubog’ nagmaneho og motorsiklo nabangga sa van, namatay

Nakabsan sa iyang kinabuhi ang usa ka utility worker human ilang motorsiklo nabangga sa gikasugat nga van alas 2:15 sa kaadlawon Miyerkules, Hunyo 11, 2025, sa Barangay Road Yati, Lungsod sa Liloan.

Si Romelito Ngujo Laguido, 28, ulitawo taga Barangay Paknaan, Mandaue City, driver sa van  kasamtangang gikustodiya sa Liloan Police Station.

Si Junbert Quipo Yaun, 22, taga Barangay Lamac, Lungsod sa Consolacion maoy nagmaneho sa Honda Click 125, dead-on-arrival (DOA) sa tambalanan samtang naangol ang angkas niini nga si Cris Vincent Seno Pepito.

Si Police Senior Master Sgt. Eric Espinosa, imbestigador sa traffic sa Liloan Police Station nga nahinabi sa Superbalita Cebu niingon nga ang mga biktima tulo sila nag-angkasanay sa motorsiklo.

Apan ang ikatulong angkas wala ra maunsa.

Gikan ang tulo sa graduation sa ilang kauban sa trabaho ug nag-inom.

Padulong sila mamauli ug way mga helmet nga nagsakay sa kusog nga dagan nga motorsiklo ug sa pag-abot sa nahisgutang lugar, nabangga sila sa gikasugat nga van. / GPL