Ben Madilynn
Gibana-bana nga multi-million nga balor sa nagkalain-laing matang sa sigarilyo, raw materials sa paghimo niini ug ang mga makina nga gitago sa usa ka warehouse sa Ouano Wharf, Barangay Looc, Mandaue City ang gironda sa mga sakop sa Criminal Investigation and Detection Group-Mandaue City Field Unit ug Bureau of Internal Revenue RR 13, Sabado sa hapon, Octubre 5, 2024.
Matod ni Police Captain Nigel Sanoy, hepe sa CIDG-Mandaue City Field Unit nga kapin sa usa ka tuig nila nga gipanid-an ang illegal nga paghimo og mga sigarilyo nga adunay marka nga Chinese characters apan mamahimo usab sila nga mo-manufacture og branded nga sigarilyo nga kalapasan sa National Internal Revenue Code.
Walay naabtan nga mga trabahante ang CIDG ug BIR sa maong warehouse nga mahimo nilang mapaubos sa imbestigasyon, apan ang kompanya nga maoy tag-iya sa warehouse ang andam nga makig alayon sa mga otoridad sa himuon nga imbestigasyon.
Grupo sa mga negosyante nga Chinese National ang giingong tag-iya sa illegal nga negosyo apan kasamtangan unang gipugngan ang ilang identity.
Gitug-an ni Sanoy nga sa milabay nga tuig nakadawat na sila og reklamo gikan sa ahensiya sa gobiyerno nga adunay mikatap nga mga sigarilyo sa merkado nga ang brand Ininsik nga giingong wala magbayad og buhis.
Tungod niini gisugdan dayon nila ang monitoring inabagan sa nagkalain-lain nga intelligence offices sa kapulisan aron ilang matultolan ang warehouse.
Milanat og taas nga panahon ang ilang monitoring ug naglisod sila sa pagtultol sa factory niini tungod kay limitado ang ilang nakuha nga kasayuran nga igo lang giingong anaa ra sa Sugbo.
Gawas sa mga sigarilyo nga ininsik mamahimo usab sila nga makagama og peke nga branded nga sigarilyo.
Tungod sa kadako ug kadaghan sa makina ug materyales sa paggama sa sigarilyo gihulagway ni Sanoy nga dako nga grupo ang nagpaluyo niini.
Si Manlalaban Jay Rozen Bartazan sakop sa Legal Division sa Bureau of Internal Revenue RR13 na surprisa sa ilang na diskobre sa sulod sa warehouse diin iyang gihulagway nga nagbalor og dako nga kantidad ang maong mga makina, raw materials ug ang mga kinahon nga finish product nga mga sigarilyo.
Dala nila ang mission order gikan ni BIR 7 Regional Director Douglas Rufino aron ipaubos sa inspection ang maong warehouse.
Iyang gibutyag nga ilang ilhon kinsa ang mga tawo nga nalambigit sa pagpasulod sa maong mga illegal nga mga kontrabando sa warehouse nga lakip sa ilang gukdon.
Matod niya nga mamahimong wala masayod ang tag-iya sa warehouse sanglit nag abang man lang kini ug nag negosyo lang usab siya.
Apan alang kang Sanoy ilang ipaubos sa imbestigasyon ang tag-iya sa warehouse aron ilang mailhan kinsa ang nag abang niini nga mga personalidad.
Atol niining pagsuwat nagpadayon pa ang imbentaryo sa BIR uban sa CIDG-MCFU kon pila ang kinatibok-ang kantidad sa ilang mga nasakmit.
