Ben Madilynn
Usa ka higanteng isda nga malasugi nga motimbang og dili mominos 70 ka kilos, ang nakuha sa namasol nga si Leo Anthony Goyo, hamtong ang panuigon, ug taga Brgy. Poblacion, lungsod sa Argao, niadtong Sabado, Septiyembre 7, 2024.
Matod ni Goyo nga gikahinabi sa Superbalita Cebu, matag weekend siya mouli sa Argao sanglit aduna siya’y trabaho sa Siyudad sa Sugbo ug kalingawan niya ang pagpapamasol sakay sa motor bangka ug pagpalawod tungod sa Poblacion.
Matod niya, samtang namasol siya sa alas 5:00 sa buntag, nikubit ang dakong malasugi ug munamuna niyang bunlot kay kusgan kaayo kini ug maguyod siya niini.
Sa alas 10:30 na sa buntag, iyang nakuha ang higanteng malasugi ug iya kining gihiktan og pisi aron guyoron sa iyang motor bangka paingon sa baybayon sa Poblacion.
Gitabangan kini pagyayong sa upat ka mga tawo ug gikarga sa tangkaltangkal nga tricycle paingon sa ilang balay.
Gihiwa kini ni Goyo ug nagkuha siya alang sa ilang kunsomo, aduna sab siya’y giapud-apod pagha tag sa iyang mga silingan ug kahigalaan samtang ang uban iyang gibaligya diin nahalinan siya og 25 ka kilos. Sa tag P350 matag kilo, nakabulsa siya og P8,750 sa kinatibuk-an.
Matod ni Goyo, mao kini ang labing unang higayon nga nakakuha og ingon niini ka dako nga isdang malasugi. / DVG
