Habagat inubanan sa LPA nagdala’g uwan

Gipahibawo sa weather burea niadtong Biyernes, Hunyo 6,2025 nga kadaghanan sa mga lugar sa nasod ang makasinati og pag-uwan tungod sa habagat ug sa trough sa usa ka low pressure area (LPA).

Ang Philippine Atmospheric, Geophysical and Astronomical Services Administration (Pagasa) niingon nga ang habagat magdala og madag-umon nga kalangitan nga adunay katag-katag nga pag-ulan ug pagpanugdog sa Metro Manila, Calabarzon, Mimaropa, Western Visayas, Negros Island Region, Zamboanga Peninsula, BARMM, ug Soccsksargen.

Samtang, ang trough sa LPA nga nahimutang 945 km. silangan sa Eastern Visayas magdala sa samang kondisyon sa panahon sa Bicol Region, Mindanao ug sa ubang bahin sa Visayas.

Nipasidaan ang Pagasa, kasarangan ngadto sa kusog nga pag-ulan niining mga dapita mahimong moresulta sa pagbaha o pagdahili sa yuta.

Ang ubang bahin sa nasod makasinati og medyo madag-umon ngadto sa madag-umon nga kalangitan nga adunay mga pag-ulan o pagpanugdog tungod sa habagat.

Ang hinay ngadto sa kasarangan nga hangin ug gamay ngadto sa kasarangan nga kadagatan ang mopatigbabaw sa tibuok kapupud-an.

Pipila ka bahin sa Metro Cebu ang nakasinati og pagbaha, lakip ang Dakbayan sa Mandaue, Cebu ug Talisay City. 

Nasayran nga niawas ang Mahiga Creek habig sa Barangay Subangdaku, Mandaue City hinungdan nga gilunopan sa baha ang highway, adunay mga video ug pictures nga gi-share sa social media diin taga-tuhod ang gilawmon sa baha sa UCLM sa Barangay Looc sa maong dakbayan. 

Gipahimangnuan kadtong mga residente nga nanimuyo sa danger zone nga magmabinantayon sa posibleng paghulpa sa yuta o ang kalit nga pag-awas sa mga kasapaaan. /PNA /FVQ