Gwen nanawagan sa LGUs, hapsay nga transparency

GIPAHINUMDOMAN ni outgoing Governor Gwendolyn Garcia ang mga local government unit (LGUs) nga tumanon ang gipangayo nga Memorandum of Agreement (MOAs) alang sa nagpadayon nga mga proyekto sa probinsiya ug i-liquidate sab ang pinansyal nga tabang, atol sa transisyon ngadto sa bag-ong administrasyon.

Sa usa ka post-election nga tigom uban sa mga mayor sa kalungsoran ug siyudad niadtong Martes, Hunyo 3, 2025, giawhag ni Garcia ang mga lokal nga lider nga motuman sa iyang gipangayo alang sa pag-apudapod sa solar lamp, paggahin sa mga armchair sa eskwelahan, programa sa Sugbo Maisan, ug ang liquidation sa pinansyal nga tabang nga gihatag sukad 2019.

Motapos ang termino ni Garcia sa Hunyo 30 human siya napilde sa iyang reelection bid alang sa ikatulo nga termino batok sa neophyte nga politiko nga si Pamela Baricuatro human sa Mayo 12, 2025, midterm polls.

Matod sa outgoing nga opisyal nga kini nga lakang alang sa proteksyon sa mga LGU bahin sa accountability.

Niingon si Garcia nga posibleng dili na mopadayon ang iyang flagship program ubos sa bag-ong pamunoan.

Si Governor-elect Pamela Baricuatro nipahibalo sa publiko sa mga plano sa pag-review sa panalapi ug proyekto sa probinsiya alang sa interes sa transparency. / EHP