Gov. Gwen maoy agdon kon P1.2B budget ipadayon pa

Giklaro ni Vice Governor-elect Glenn Soco nga ang Executive Department na ang mohukom kon ipadayon pa ba ang P1.2 bilyunes nga Supplemental Budget No. 1 (SB1).

Ang badyet nagtumong sa pagpundo sa nagkadaiyang mga proyekto ug programa nga itugyan ngadto sa buhatan ni Soco. 

Apan si Third District Board Member John Ismael Jiembo Borgonia niangal sa SB human iyang giprotestahan ang pagduso niini tungod kay dili makaayo alang sa bag-ong administrasyon ni Governor-elect Pamela Baricuatro nga molingkod na sa Hunyo 30.

Nitumaw ang init nga deliberasyon sa regular nga sesyon niadtong Lunes, Mayo 27, 2025, diin si Soco niingon nga ang iyang gihimo pagpanalipod sa integridad sa Provincial Board.

Ang tensyon nitumaw human si Borgonia nihimo og pamahayag nga “sweeping and damaging characterization,” nga niresulta sa panaglalis tali sa duha ug sa ubang mga miyembro sa board atol sa sesyon. Sa wala pa ang sesyon, si Borgonia niduso og resolusyon aron paglangay sa pag-apruba sa SB1, apan nabasura pinaagi sa house division. 

Apan iyang gi-withdraw kay dili na angay kay ang pagtuki sa SB1 wala malakip sa agenda niadtong Lunes. 

Tungod niini, ang badyet gibalik sa Executive Department alang sa dugang pagtuon.

“I have always fulfilled my responsibilities with integrity, upholding transparency and accountability in all that I do,” matod pa ni Soco.

“Accusations like these not only undermine our processes but also cast doubt on the collective intent of those who are working earnestly for the public good,” dugang pa niya. 

Si Soco niawhag ni Borgonia nga mangayo og pasaylo ngadto na usab sa sakop sa PB may labot sa iyang pamahayag niadtong 

Mayo 21, nga matod pa ang special session usa ka “clear evident bad faith” nga gituyo sa pagpiang sa administrasyon ni Baricuatro.

Si Borgonia niangkon nga wala siya motambong sa maong special session.

PAM 

Sa wala pa ang regular sesyon, ang organizers sa People’s Agenda Movement (PAM) alang sa Cebu naghimo og protesta ug nakigkita sa outgoing nga Bise Gobernador Hilario Davide sa atubangan sa Legislative Building.

“We pray that this P1.2B supplemental budget ordinance will not be returned and refiled, especially as we are now in a transition period. A fund this large should be entrusted to the newly elected governor,” nagkanayon si Borgonia niadtong Lunes, Mayo 26. 

Si Borgonia nipatin-aw nga wala siyay intensiyon nga masakitan ang pagbati sa iyang mga kauban pinaagi sa iyang opinyon. / EHP