Ben Madilynn
Kritikal ang pag-umangkon dihang nakabaton og mga samad tinigbasan sa nagkadaiyang bahin sa lawas human gitigbas sa iyang uyoan, alas 11:30 sa gabii, Huwebes, Oktubre 3, 2024, sa Sityo Private, Brgy. Mantalongon, lungsod sa Dalaguete.
Ang biktima mao si Jose Mervin Ramos, 30, minyo, mag-uuma, ug ang suspek ang iyang uyoan sa pag-agawan nga si Nilo Gamboa, 32, ulitawo, mag-uuma. Ang duha pulos mga molupyo sa dapit.
Sa interview sa Superbalita Cebu ngadto kang P/Cpl. Jerson Entice, ang investigator on case sa kapulisan sa Dalaguete, nasuta nga ang duha diha sa gawas sa ilang tagsa-tagsa ka balay.
Matod pa, ang biktima nanghambog ngadto sa iyang uyoan nga suspek nga nakakita siya’g sumbagay sa Sityo Lugsangan, Mantalongon, Dalaguete ug nalubag niya ang kamot sa iyang gikasumbagay sa gihinganlan og Guillermo nga kauban niya sa inom.
Matod pa, wa ganahi ang uyoan naminaw sa pag-umangkon kay iya usab nga kumpare si Guillermo nga naresulta sa ilang panaglalis.
Sanglit ang suspek may dala nga sanggot, iyang gisanggot ug gitigbas sa makadaghang higayon ang biktima.
Ang biktima gidali sa pagtabang sa responders sa Dalaguete ngadto sa Bogo Argao ICKMH District Hospital, samtang ang suspek nadakpan sa hot pursuit sa kapulisan sa Dalaguete ubos sa kamanduan sa hepe nga si Police Major Vincent Awit Zozobrado.
Nagpaabot ang suspek nga mapasakaan og kasong frustrated murder. / DVG
