Gidudaha’ng asset gipatay sa ex-convict

Gikatahong asset sa polis ang gipusil-patay niadtong Biyernes, sa 9:35 sa gabii, Agusto 30, 2024 sa Sitio San Juan, Alaska, Barangay Mambaling, Dakbayan sa Sugbo.

Ang biktima gi-alyas og Dex, 43, residente sa nahisgutang lugar ang nakaangkon og samad pinusilan sa ulo ug sa ubang bahin sa iyang lawas.

Sa nagpadayon nga imbestigasyon sa kapulisan giingong adunay nakasaksi sa maong pagpamusil nga mitudlo sa usa ka MJ, nga matod pa usa ka ex-convict nga taga-Brgy. Duljo Fatima nga adunay laing kauban sa dihang ghimo ang kremin.

Ang identity sa biktima ug suspek kasamtangan nga gipugngan agi’g pagsunod sa protocol nga gipatuman sa polis samtang nagpadayon ang imbestigasyon.

Gibutyag ni Police Major Efren Diaz, hepe sa Mambaling Police Station nga human sa pagpamusil dali nga misibat ang duha ka suspetsado paingon sa sea wall sa Duljo Fatima ug nahanaw.

Gibutyag ni Diaz nga nagduda ang suspek nga nagpaniid sa illegal nga kalihokan ang biktima sa lugar ilabi na nga bag-o pa sa dapit ang biktima.

Gidudahan ni MJ nga asset si Dex nga posible maoy hinungdan nga gipatay.

Gikataho nga ang maong suspek giila nga maoy responsabli sa mga nahitabong pagpamusil sa area nga ubos sa hurisdiksyon sa Mambaling police station ug giingong hitman sa usa ka drug personality.

Niadtong miaging adlaw gipangita kini sa mga polis apan nakasibat.

Si MJ ang gitudlo sa pagpusil niadtong live-in partner sa Sityo Micabaja, Brgy. Duljo Fatima nga nahitabo niadtong Agusto 25, 2024.

Atol niining pagsuwat, nagpadayon ang manhunt batok sa mga suspek. / Dugang taho ni DVG