Ben Madilynn
Patay na nga napalgan ang usa ka 62 anyos nga lalaki sa sulod sa usa ka lawak sa usa ka Hotel nga nahimutang sa dalan Osmeña Boulevard, Barangay Kalubihan sa dakbayan sa Sugbo alas 11:40 sa Biyernes sa buntag, Septiyembre 20, 2024.
Ang biktima giila nga si Juan Arances Odiong, 62, residente sa Ibarra Street, Barangay Parian sa dakbayan sa Sugbo.
Dali nga miresponde ang mga police sa Carbon police station ug ilang naabtan ang biktima nga naghigda sa kama nga nagsugpa na og dugo.
Sa inisyal nga imbestigasyon nasuta nga mi check in ang biktima sa alas 2:30 sa Huwebes sa hapon, Septiyembre 19, 2024.
Apan pagka alas 11:30 sa Biyernes sa buntag ang house keeping staff nga si Roselyn Pañamogan nakadungog og agulo nga tingog sa sulod sa room 1428 nga giabangan sa biktima.
Dali niya nga gipahibawo ang receptionist aron matawgan ang intercom nga naa sa sulod sa lawak apan wala gyud kini motubag.
Ila usab nga gipahibawo ang manager labot sa hitabo ug mimando ni nga ablihan ang kwarto ug sa ilang pagsulod misugat sa ilang panan-aw ang nagbuy-od na nga biktima nga nagkadugo na ang nawong niini.
Matod ni Police Major Eric Gingoyon nga walay kauban nga ni check in ang biktima sa hotel ug tungod ani nagtuo sila nga kini giatake.
Apan ila pa nga ipa autopsy ang patayng lawas sa biktima aron masuta kon unsa gyud ang gikamatyan niini. / AYB
