Gerald Anderson, Nilinaw Ang Isyung ‘Babaero’ at ‘Cheater’ Siya

 Sa pinakabagong panayam ng “Toni Talks” hosted ng Ultimate Multimedia Star na si Toni Gonzaga-Soriano, muling naging sentro ng atensyon ang Kapamilya actor na si Gerald Anderson. Isa sa mga matapang at diretsahang tanong sa aktor ay kung paano niya hinarap ang negatibong pananaw ng publiko tungkol sa kanya, lalo na’t madalas siyang tawaging “babaero” o kaya ay “cheater.”

Bago pa man nila talakayin ang mga isyung ito, inamin muna ni Gerald na may mga pagkakataong nahuhulog siya sa kanyang mga leading ladies. Sa industriya ng showbiz, karaniwan nang mas tumitindi ang emosyon ng mga artista sa kanilang kapareha dahil sa matagal na oras ng pagkakasama at matitinding eksenang kinakailangang gawin.

Hindi rin itinanggi ng aktor na may mga naging karelasyon siyang mga aktres na una niyang nakasama sa mga proyekto. Kabilang dito sina Kim Chiu at Bea Alonzo, na kapwa naging malalaking bahagi ng kanyang buhay pag-ibig. Bukod pa rito, kasalukuyang karelasyon ni Gerald si Julia Barretto — na una niyang nakapareha sa pelikulang “Between Maybes” noong 2019. Ang pagsisimula ng kanilang relasyon ay naging kontrobersiyal, lalo na matapos lumabas ang isyu ng diumano’y “ghosting” niya kay Bea Alonzo, na naging viral at naging usap-usapan sa buong showbiz industry.

Dahil sa mga kontrobersyang ito, marami ang nagkaroon ng negatibong pananaw kay Gerald, na tila inukit sa isipan ng publiko ang kanyang imahe bilang isang lalaking mahilig makipagrelasyon at hindi seryoso. Kaya’t diretsahang tinanong ni Toni sa aktor: “Paano mo hinandle ‘yon, kasi ang naging tingin sa ‘yo ng mga tao, is either babaero ka or cheater?”

Hindi nag-atubiling sumagot si Gerald at sinabing hindi totoo ang mga akusasyon laban sa kanya. 

“Alam n’yo kung sino mga naging girlfriends ko, hindi ko naman maitago, alam n’yo eh… ‘pag sila ‘yong girlfriend ko, sila talaga. Walang iba, walang ano…” paliwanag ng aktor.

Pinilit din ni Toni na linawin: “Hindi ka nag-cheat?”

Agad na sagot ni Gerald, “No,” sabay sabing naging tapat siya sa mga naging karelasyon niya. Ngunit nang tanungin kung siya ba ay kailanman nahulog sa tukso, inamin niya ang katotohanang minsan ay mahirap labanan ang mga ganitong sitwasyon, lalo na sa kanilang propesyon bilang artista.

“Aaminin ko, it’s almost impossible especially sa work natin, sa environment natin, sa situations natin na hindi ka mafa-fall [sa temptation]. Especially at the young age and everything is ibinabato na lang sa ‘yo lahat, so it’s very hard to not fall into that,” ani Gerald.

Inilahad din niya na ang mga karanasan niya sa nakaraan ay nagpatibay sa kanya at nagturo sa kanya kung paano maging mas responsable sa kanyang mga desisyon sa buhay at pag-ibig.

Sa kabuuan ng panayam, malinaw na sinikap ni Gerald na linisin ang kanyang pangalan mula sa mga maling akusasyon, habang ipinapakita rin ang kanyang pagiging totoo sa mga naging pagkukulang. Aminado siyang may kahinaan din siya noon, ngunit ngayon ay mas pinipili niyang maging maingat sa kanyang personal na buhay.