Gamit sa paghimo og armas sa Danao gitahan

Laing mga gamit sa pag-gama og paltik nga armas nga nahimutang sa Barangay Masaba sa Dakbayan sa Danao ang gi-surrender ngadto sa 701st Maneuver Company sa Regional Mobile Force Battalion (RMFB 7) alas 8:30 sa gabii, Biyernes, Mayo 30, 2025.

Ang mga gipangtahan nga ka­gamitan mao ang duha ka bench drill presses, 13 bench vises, 15 hacksaws, 82 ka steel files ug upat ka gun pattern o frames.

Kini nga mga items maoy gigamit sa paggama sa mga illegal nga mga armas nga kasamtangan nga gikustodiya sa RMFB 7 alang sa saktong documentation ug disposal.

Niadtong miaging semana, milusad og subsub nga operasyon ang kapulisan sa Central Visayas batok sa loose firearms ug pag-ila sa mga tighimo og armas sa Danao.

Human makita ang presensya sa daghang mga polis, usa ka concerned citizen ang miduol kanila ug mipahibawo nga iyang i-surrender ang mga gamit sa paghimo sa armas.

Tungod niini, ang hepe sa Police Regional Office (PRO 7) nga si Police Brigadier General Redrico Maranan mibutyag nga daghan’g kinabuhi ang nasalbar sa pag-surrender sa maong mga gamit. Ang ilang kampanya batok sa mga loose firearms nagpakita sa ilang walay hunong nga paghatag sa kahusay ug kalinaw sa tibuok rehiyon 7.

“Each piece of equipment turned over represents a life potentially saved from gun violence. The relentless efforts of our personnel to root out sources of illegal firearms reflect our unwavering commitment to maintaining peace and security in Central Visayas. Our goal remains clear — zero gun-related crimes in the region,” matud ni Maranan.

Ang PRO 7 nagpadayon sa ilang pag-awhag sa publiko hilabina niadtong nalambigit sa paghimo og paltik nga armas sa siyudad sa Danao ug silingang mga lungsod nga wa pa madakpi nga i-surrender ang ilang mga gamit. / AYB