Ben Madilynn
Nikirig ang usa ka foreman sa dihang nakuryentihan samtang adunay gitrabaho nga balay niadtong alas 10:00 sa buntag, Martes, Mayo 27, 2025, sa Barangay Poblacion, Lungsod sa Pinamungajan.
Ang namatay naila nga si Oliver Manguilimotan, 42, minyo, residente sa Barangay Angilan, Lungsod sa Aloguinsan.
Subay sa imbestigasyon sa Pinamungajan Police, nakadawat sila og tawag nga nagpahibalo nga
adunay nakuryentihan sa maong dapit ug ilang girespondihan.
Saysay sa mga kauban ni Manguilimotan nga giayo niya ang wirings sa kuryenti sa balay nga ilang gitrabaho.
Gitiwas ni Manguilimotan ang iyang trabaho samtang iya unang gipapahuway ang mga trabahente ug nadunggan na lang ang inagulo nga daw nag-antos sa kasakit.
Sa dihang gisusi sa mga kauban, nakit-an na lang si Manguilimotan nga nikirig samtang nagunit sa usa ka puthaw sa kisame.
Matod pa nga nahikapan sa maong foreman ang wire nga adunay napanit sa C-purlins sa kisame.
Dali nga gipalong ang planka sa suplay sa kuryente ug gitabang ang biktima nga diha sa kisame ug gipakanaog.
Gidala ang biktima sa Pinamungajan District Hospital apan gideklarar nga patay na. / JDG / GPL
Source: Foreman nakuryentihan samtang nag-ayo sa wirings
