Ben Madilynn
Ang festival float sa sa lungsod sa Pinamungajan nga misalmot sa Pasigarbo sa Sugbo 2024 ang nakasugat og vehicular accident sa Barangay Media Once, Toledo City, alas 2:45 sa hapon, Lunes, Agusto 26.
Base sa inisyal nga taho nga adunay unom ka mga sakyanan ang nalambigit sa karambola sa kalsada diin naapil og kaharos sa float sa Pinamungajan nga pauli na sa ilang lungsod nga nanukad sa Cebu City.
Ang Isuzu Flat Bed type truck nga gimaneho Reynaldo Getes, nga gikan pa sa Dakbayan sa Lapu-Lapu paingon sa Asturias, Cebu.
Samtang ang ikaduhang sakyanan nga Isuzu NKR Stake Truck type ug ang Mitsubishi Fuso self loader truck nga nagdala sa plate no. JAE 7624 nga mao ang float nag-una sa trak nga gimaneho ni Getes.
Gikatahong nawad-ad og preno ang sakyanan ni Getes nga midumbol sa Isuzu NKR Stake truck nga milahos sab ngadto sa float.
Atol sa maong karambola naigo ang Honda motorcycle, multicab, ug Mitsubishi Pajero.
Naangol ang drayber sa NKR truck nga Loreto Estrada ug nadala sa tambalanan.
Ang maong float gikargahan sa mga butang sa ilang dancing contingents ingon man props, samtang ang mga dancer sakay sa laing sakyanan.
Nakamugna og kahuot sa trapiko sa maong lugar tungod kay mibabag kini sa tunga nga bahin.
Sa laing bahin, si Cebu Governor Gwendolyn Garcia mitunol og P200,000 nga cash assistance ngadto sa Lungsod sa Dumanjug human nga naugdaw sa sunog ang audio van ug decorated float sa maong lungsod pipila ka oras sa wa pa ang aktuwal nila nga presentation sa Pasigarbo niadtong Dominggo, Agusto 25.
Misaad sab si Garcia nga motanyag sa iyang usa ka buwan nga suweldo ngadto sa Dumanjug.
Ang maong financial assistance gitunol agi’g timaan sa ‘resilience and commitment’ sa maong lungsod nga wa matarog og padayon sa ilang presentation taliwala sa kakulian. / AYB, DVG
