Estados Unidos, mangipatulod kadagiti baro a fighter jets idiay Japan

LAOAG CITY – Mangipatulod ti United States military kadagiti baro a fighter jets idiay Japan.

Basar iti United States Defense Department a paset daytoy ti $10-billion nga upgrade ti puersa iti pagilianda.

Kadagiti sumaruno a tawen ket maipatungpal daytoyen kas panangpapigsa ti alyansa ti Japan ken United States tapno mapaigetan ti kinakippia ken kinaulimek iti nasao a rehion.

Pakairamanan ditoy ti 48 a fifth generation F-35A fighter a suktanda ti 36 nga F-16s a nakaidesignar iti Misawa Air Base iti northern Japan, 36 a baro nga F-15EX jets a nakaidesignar iti Kadena Air Base iti southern Okinawa a suktanda ti 48 dagiti daan nga F-15C/D models nga immunan nga inikkatda.

Innayon pay ti Pentagon nga iyurnosda ti naidesignar nga F-35B aircraft nga adda iti isla ti Honshu.

Maipalagip a kadagiti naglabas a tawen  ket nagbalinen a naiget ti alyansa ti United States ken Japan tapno solbaren ti aniaman a pangta kontra iti Russia, China ken North Korea.