Enrollees sa Rehiyon 7 hayan moabot sa 1.5M

GIPAABOT sa Department of Education sa Central Visayas (DepEd) 7 nga moabot sa 1.5 ngadto sa 1.6 ka milyon nga mga estudyante ang ma-enroll alang sa umaabot nga school year 2025-2026.

Giawhag ni DepEd 7 Director Salustiano Jimenez ang mga ginikanan ug guardians nga irehistro ang ilang mga anak sa dili pa ang gitakdang Oplan Balik Eskwela.

Ang paglusad sa Brigada Eskwela gikatakda sa Lunes, Hunyo 9, 2025. 

Giklaro ni Jimenez nga samtang modawat gihapon sila og mga estudyante nga magparehistro sa unang adlaw sa klase, hugot niyang gidasig nga dili maglangay-langay.

Giawhag ang mga ginikanan o tigbantay nga iparehistro ang mga estudyante sa dili pa magsugod ang klase aron malikayan ang bisan unsang kasamok sa pagpangandam sa ilang tagsa-tagsa ka eskwelahan.

Matod niya nga ang rehiyon nakadawat og 500,000 ka mga estudyante nga kasamtangang narehistro sa early enrollment program, apan aduna silay tumong nga labing minos 1.5 ka milyon nga mas gamay kon itandi sa miaging tuig nga 2.4 ka milyunes nga na-enroll. Ang gidaghanon karong tuiga wala maapil sa school division gikan sa Negros Oriental ug Siquijor tungod sa pagmugna sa Negros Island Region (NIR).

Ang Police Regional Office (PRO) 7 naka-deploy og 1,510 ka personnel sa Central Visayas alang sa “Balik Eskwela” nga motabang sa mga tinun-an, ginikanan, magtutudlo, ug mga opisyal sa eskwelahan aron masiguro ang malinawon ug hapsay nga pagbukas sa klase.

Sigon ni Jimenez nga ang dakong kakuwang sa classroom nagpabilin nga kabalaka nga kapin sa 3,000 ang gikinahanglan sa Cebu lamang. 

Ang kinatibuk-ang kakuwang alang sa Cebu ug Bohol moabot sa 5,000 ka classroom, walay labot ang Negros Oriental ug Siquijor. Gipasabot niya nga ang gidaghanon sa mga classroom nga gikinahanglan nagdepende sa enrollment figures nga adunay ideal nga ratio sa usa ka magtutudlo matag 40 ka estudyante matag classroom.

Ang kakuwang sa mga classroom mosangpot sa class shifting. 

Ang gidaghanon sa mga magtutudlo nga gikinahanglan, matino sa sunod semana.

Matod niya nga ang Secretary uban sa Strategic Planning Management sa DepEd nagpadayon sa Public-Private Partnerships (PPP) ubos sa Strategic Management aron makatukod og mga classroom.

Naglakip kini sa pakigtambayayong sa pribadong mga kompanya ug Non-Government Organization alang sa mga donasyon sa mga proyekto sa imprastraktura sama sa mga classroom.

Matod ni Jimenez nga ang mga Local Government Units (LGUs) ug uban pang mga kompanya giduol alang sa mga donasyon.

Ang tanang estudyante nga narehistro dawaton bisan pa sa kakuwang sa classroom, subay sa “no student left behind” policy.

Kalabot sa Mpox

Ang Department of Health (DOH) magpagawas og joint memorandum circular uban sa DepEd aron mapugngan ang pagkatap sa Monkeypox (mpox) sa mga pampubliko ug pribadong eskwelahan sa tibuok nasod.

Ang mga giya magsentro sa pagsiguro sa tubig ug igong pasilidad sa kalimpyo sulod sa mga eskwelahan.

Maggiya sab kini sa mga lokal nga opisyal sa eskwelahan sa estrikto nga pagpatuman sa mga protocol sama sa mandatory isolation alang sa gidudahang may mpox cases. 

Ang mga sintomas mahimong makita sulod sa duha ngadto sa upat ka semana, ug ang pag-isolate mahimong moabot og 21 ka adlaw.

Sumala ni Jimenez, ang mga estudyante nga nagpakita og sintomas i-refer sa mga medical expert, ug ipahigayon ang contact tracing apan nagpaabot pa ang DepEd og piho nga mga giya alang sa mga eskwelahan.

Maoy lagda sa DepEd nga ang mga lokal nga opisyal sa eskwelahan mahimong mo-shift sa modular, blended, o distance learning kon gikinahanglan sa panahon sa medical emergency. / EHP