Ben Madilynn
Kon ganahan mo mag-athlete, sa UC gyud mo.”
Tipik kini sa hamubong mensahe sa weightlifting Olympian sa University of Cebu (UC) nga si Elreen Ann Ando atol sa heroes’ welcome nga gidalit sa UC alang kaniya ug sa kauban niyang weightlifter nga si John Febuar Ceniza.
Gipasabot ni Ando, kinsa usa ka Philippine Coast Guard reservist ug varsity athlete, grabe ang suporta sa UC sa ilang student-athletes.
Wala na madetalye og maayo ni Ando kon nganong nakasulti siya niini apan makita sa iyang mga mata ang pagkakuntento.
Gani, bisan wala makakuha og medalya sila si Ando ug Ceniza sa niaging Paris Olympics, gipalipayan gihapon sila og P400,000 kada usa samtang ang ilang coaches nga sila si Ramon Solis ug Christopher Bureros, nakadawat og P300,000 kada usa.
Ang nangahisgutan pulos wala nagdahom niini.
Gipasabot ni UC President Candice Gotianuy nga ang pag-qualify pa lang nila ni Ando ug Ceniza sa Paris Olympics nakahatag na og dakong garbo sa tunghaan ug angayan lang suklian ang ilang nahimo.
Ang mensahe ni Ando gisuportahan ni UC athletic director Jessica Jawad Honoridez.
“Grabe gyud ang support sa UC sa student athletes. Sa akong nahibaw-an, ang UC ra man tingali ang wala nihunong paghatag og scholarships sa student-athletes during pandemic,” batbat ni Honoridez.
Gitataw ni Honoridez nga usa sa iyang nauyonan sa pagpadagan sa UC sa ilang sports program mao ang estriktong pagpatuman sa lagda niini alang sa ilang student-athlete scholars – kinahanglang dili mapasagdan ang pagtungha.
“Wala ma’y gipangayo nga average basta makapasar lang kay mao gyud na ang main goal sa UC,” pasabot ni Honoridez.
Matod ni Honoridez nga sa kasamtangan, ang UC adunay kapin sa 300 ka student-athlete scholars.
Kuli nga ning maong gidaghanon, adunay molampos sa kalibutan sa sports ug hasta sa pagtungha kay dili sayon ang kinabuhi sa student-athletes apan wala’y imposible sa grabeng paninguha.
