Ben Madilynn
Nisamot kaalegre ang pulitika sa dakbayan sa Mandaue human gisuspenso sa Office of the Ombudsman si Mayor Jonas Cortes ug niasumir ning semanaha isip acting mayor si Vice Mayor Glenn Bercede ug acting vice mayor nga si Konsehal Nerissa Soon-Ruiz.
Unang namahayag si Bercede nga iyang ipadayon ang mga programa ug mga plano ni Cortes nga kauban sa partido ni Cortes. Samtang nipadayag usab siya nga pulitika o dunay politiko nga nagpaluyo sa pagkasuspenso sa mayor.
Gibasehan ni Bercede ang makaduda nga pagpakahilom sa ‘oposisyon’ sa Mandaue bahin sa gidangatan ni Cortes nga gisuspenso og usa ka tuig nga walay suweldo. Maisip nga silot kini sa kalasapasan nga nahimo.
Si Bercede wala motumbok og ngan sa oposisyon. Dili ba kaalyado sila tanan sa Mandaue base sa miaging eleksiyon? Hinuon, gawas kon nasiak na kini.
Apan kagahapon, Miyerkules, Agusto 21, 2024, si Acting Vice Mayor Soon-Ruiz nipahibalo nga nagplano nga mopatuman sa mahinungdanong mga kausaban sa panahon sa iyang paglingkod sa pwesto.
Usa sa giklaro sa acting vice mayor mao ang kamahinungdanon sa independente o usa ka tino nga kalainan tali sa sanag sa lehislatibo ug ehekutibo.
Gipasabot ni Soon-Ruiz sa pagsiguro nga ang legislative body dili lamang pag-aprubar sa mga desisyon sa ehekutibo nga walay tino nga pagtuki ug pagsusi.
Usa sa iyang mga nag-unang tumong mao ang usa ka bug-os nga pagrepaso sa mga badyet sa departamento, uban ang panaad nga maampingong mosusi sa matag alokasyon sa salapi.
Mura’g nag-ung-ong ang susamang nahitabo dagan sa pulitika sa dakbayan sa Sugbo tungod sa pagsilbi ni Mayor Michael Rama sa unom ka buwan nga preventive suspension nga motapos karong Nobiyembre ug nihulip si Bise Mayor Raymond Alvin Garcia isip acting mayor.
Duha kaalyado unta sa pulitika apan dunay hinayhinay nagkasiak ang relasyon sa pagkakaron.
Hinuon, si Bercede nakaserbisyo na isip mayor sa mga panahong wala o mobiyahe si Cortes apan giingon nga lahi kining kahimtang karon human mas taas nga panahon sa pagkawala sa mayor.
Samtang, dili na katingad-an sa pulitika sa nasod nga giingong ‘walay perminteng higala’ apan ang ato lang dili usab maapiki ang kalamboan sa Mandaue ug ang serbisyo sa publiko nga way pagpihig, patas ang tanan.
