Ben Madilynn
Insakto 146 ka mga tuig ang nakalabay, gipanganak ang usa ka personalidad nga nakatampo og dako sa kon unsa karon ang Sugbo.
Dili lang sa Sugbo, nakatampo gyud siya og dako sa tibuok Pilipinas.
Gitumbok mao si anhing Sergio Osmeña Sr., kinsa natawo niadtong Septiyembre 9, 1978 sa Dakbayan sa Sugbo.
Tungod kaniya, napasar ang usa ka balaod nga himuong special non-working holiday sa Probinsya sa Sugbo ang iyang adlaw nga natawhan.
Kinsa man diay kini si Osmeña, ang gitawag og Grand Old Man of Cebu?
Si Osmeña usa ka bantugang peryodista sa Sugbo apan tungod sa iyang pagkamaalagaron sa katawhan, nabalhin ang iyang atensyon sa pulitika.
Nag-alagad siya isip unang Speaker sa Philippine Assembly niadtong 1907 diin iyang gipakita ang iyang dedikasyon sa demokratikong prinsipyo ug panggobiyerno.
Human niini, inanay nga nagsaka ang posisyon ni Osmeña sa pulitika hangtod nga nahimo siyang presidente sa nasod niadtong 1944 atol sa Ikaduhang Gubat sa Kalibutan.
Sa iyang liderato, dili ikalimod nga napalambo niya ang Pilipinas, nga usa sa labing adunahang mga nasod sa Asya niadtong higayuna.
Niini, dili kahibulngan nga adunay laing mga Osmeña nga ningsulpot sa natad sa pulitika.
Usa na niini, ang iyang apo nga si Tomas “Tommy” Osmeña.
Sama sa iyang apuhan, si Tomas adunay dedikasyon sa pag-alagad sa katawhan pinaagi sa pulitika.
Gikan niadtong ulahing bahin sa dekada 80, nag-alagad si Tomas isip mayor sa Dakbayan sa Sugbo, posisyon nga iyang gigunitan sa hataas nga panahon.
Apan niadtong 2019, wala damhang napilde siya ni anhing Edgardo Labella sa piniliay isip mayor sa Queen City of the South.
Mura’g senyales na man tingali kini nga nihupas na ang amor sa pulitika ngadto ni Tomas.
Apan sa edad nga 76, gianunsyo ni Tomas nga mobalik siya sa pulitika ug molansar isip bise mayor sa Dakbayan sa Sugbo.
Dili na man tingali kini angayang buhaton ni Tomas ug mas maayong hingpit na lang siyang moretiro, maglingaw sa iyang kaugalingon.
Apan gawas sa pulitika, unsa pa kaha’y hilig ni Tomas?
