Eco-Park sa Cebu City buhion; plastik nga botelya idili na

Nagtinguha si environmental advocate ug Mayor-elect Nestor Archival pagbanhaw sa Cebu City Eco-Park, kanhi Cebu Zoo, ug ang pagdili na sa plastic bottles sulod sa City Hall.

Sa usa ka interview sa media niadtong Martes, Hunyo 3, 2025, gitumbok ni Archival ang limitadong gidaghanon sa mga parke nga anaa karon sa siyudad.

Ang Cebu City Eco-Park nga may gidak-on nga pito ka ektarya, gigahinan og P120 milyunes nga budget.

Apan nasayran ni Archival gikan sa mga personnel nga gi-assign sa parke nga ang gigahin nga pundo gigamit alang sa laing proyekto apan wala na siya mohatag og dugang detalye bahin niini.

Inig lingkod niya sa katungdanan, giklaro ni Archival nga iyang susihon kon unsay gigamitan sa gigahin nga budget.

Kon walay makita nga pundo, mangayo siya og tabang sa pribadong sektor.

“Maghinayhinay ta og balik ana, considering nga naay park man gud. Naay certain animals nga makita sa mga tawo, labi na sa mga kabataan,” matod ni Archival.

Giklaro niya nga kon mabanhaw na ang Cebu City Eco-Park, mga mananap nga low-maintenance mao lang una ang atimanon tungod sa kakuwang sa pundo.

“Akong gihunahuna ana ato nang ibalik, dili lang katong dagko kaayong mga mananap, kanang dagko maglisod ta kay sa pagkakaron wala man tay funds,” iyang gipasabot.

Isip usa ka lig-on nga environmental advocate, giisip ni Archival ang pagbanhaw sa Cebu City Eco-Park isip usa ka “proof of concept” nga gidisenyo aron awhagon ang suporta sa publiko alang sa mga isyu sa kinaiyahan.

Plastic Bottles idili sa City Hall

Samtang, gipahibalo sab ni Archival nga iyang idili ang plastic bottles sa City Hall ug giawhag ang mga empleyado ilabina ang mga department head nga magdala sa ilang kaugalingong personal nga tumbler.

Matod niya nga aduna unyay water dispenser nga ibutang sa mga meeting area.

Gikan sa personal nga kasinatian, iyang gisaysay ang pagtambong sa unom ka miting moresulta sa unom sab ka plastic water bottles nga ilabay.

“There’s so much wastage,” matod ni Archival ug nidugang nga iyang nakita ang katunga nga mga botelya nga may sulod pang tubig ang gipanglabay lang.

“Timan-i, in the future, kon dili ni nato himuon mas labaw pa ni sa Mad Max. Sauna, ang Mad Max ang giaway kay gasolina. So in the future, mag-away ta sa tubig and this is something not good,” matod niya. / JPS