Dul-an tunga sa bilyon nga shabu, nasakmit

Dul-an sa tunga sa bilyun ka pesos nga balor sa ilegal nga drugas ang nasakmit, samtang dul-an 4 mil ka mga drug suspects sab ang nasikop sa Police Regional Office (PRO) 7 sulod sa lima ka buwan nga anti-criminality operation gikan sa Enero 1, 2025, hangtod sa Mayo 31, 2025.

Sa data nga gipahibalo sa PRO 7,  nakasakmit ang kapulisan og 72.32 kilos sa gituohang shabu nga dunay standard drug price nga P491.8 million ug P3 million nga balor sa marijuana plants.

Nakasikop sab sila og 3,948 ka mga drug suspects.

Sa lima ka buwan nga operation, nakalusad ang PRO 7 og 3,420 ka anti-illegal drug operations nga niresulta sa pagkasikop sa 215 ka high value targets, 2,180 ka street level drug suspects ug 1,553 ka bag-ong drug personalities.

Samtang sa ilang kampanya batok kriminalidad ug paggukod sa mga pinangita sa balaod, nakasikop sab sila og 2,817 ka mga wanted person lakip na niini ang 410 ka most wanted.

Apil sa mga nadakpan ang 93 ka most wanted person nga nabutang sa regional level, 157 sa provincial level, 44 sa city level, 110 sa municipal ug unom sa station level ug 2,407 ka mga akusado nga dunay mga pending warrant of arrest sa nagkalainlaing kaso. / AYB