Ben Madilynn
Nalangay sa makadaghang mga higayon ang pagsugod sa pagtukod sa New Cebu International Container Port (NCICP) sa Barangay Tayud sa amihanang lungsod sa Consolacion, Sugbo, ug karon nisulbong na ngadto sa P16.9 bilyunes ang gasto sa proyekto.
Ang information officer sa Cebu Port Authority (CPA) nga si Maryknoll Bolasa, sa text message niadtong Dominggo, Hunyo 30, 2024, nagkanayon nga ang National Economic and Development Authority (Neda) Board nga gipangulohan ni Presidente Ferdinand Marcos Jr. proyekto niuyon sa P7.7 bilyunes nga dugang sa proyekto.
Sa Agusto 2023 nga taho sa SunStar Cebu, ang rekord sa Neda nagpakita nga ang proyekto nagkantidad og $199,250,000.
Sa sinugdan, ang Korean nga loan sa bangko maghatag og $172,641,000, samtang ang nahabilin nga $26,609,000 magsilbing counterpart funding sa gobyerno sa Pilipinas.
Hinunoa, ang $172.641 milyunes nga kasabutan sa pautang balido lamang gikan sa Sept. 21, 2018 hangtod Agusto 21, 2023.
Sa pag-expire sa loan, ang SunStar Cebu nisuway pagkuha og dugang impormasyon gikan sa CPA, apan limitado ang mga detalye nga anaa sa pagsuwat ning taho.
Gisuwayan usab sa SunStar Cebu nga ma-contact ang Neda 7 alang sa dugang detalye sa hinungdan sa pagtaas o maayo sagasto sa proyekto, apan pakyas.
Nakuha sa gobyerno sa Pilipinas ang pundo kaniadtong 2018 gikan sa Export Import Bank of Korea, hapit duha ka dekada sukad gimugna sa Japan International Cooperation Agency ang masterplan alang sa NCICP kaniadtong 2002.
Una nang giingon sa Neda 7 nga mahuman unta ang proyekto sa Agusto 2022 subay sa loan agreement, apan hangtod karon, wala pa kini maka groundbreak. / JJL
