Drayber sikop sa warrant of arrest

ATUBANGON sa pedicab drayber ang kasong duha ka ihap sa Qualified Theft human madakpi sa mga pulis alas 12:35 sa udto niadtong Hulyo 4, 2024.

Nadakpan si alyas Melvin, 30-anyos, kinsa molupyo sa Purok 1, Makabayan, Brgy. San Isidro, siyudad sa Tagum human gisilbihan sa mga personahe sa Tagum City Police Station, pangulohan ni PSMS Remillo P. Dacapio Jr. og warrant of arrest sa maong adlaw.

Giabagan ang Tagum City police sa mga personahe sa Provincial Investigation and Detective Management Unit sa Davao del Norte Provincial Police Office ug 1st Davao Norte Provincial Mobile Force Company (DNPMFC) sa manhunt operation sa suspek.

Gimando nga dakpon si alyas Melvin tungod sa kasong kawat ni Presiding Judge Sharon Rose T. Saracin sa Regional Trial Court, Branch 30, Tagum City, Davao del Norte, penitsahan og Hunyo 18, 2024.

Ang kasong giatubang sa suspek dunay girekomendar nga piyansa nga mokantidad og Php 24,000 matag usa.

Samtang nanawagan ang kapulisan sa Tagum City police ngadto sa mga Tagumenyos nga makig-alayon sa ilang buhatan kung dunay masayran nga krimen, mga pinangita nga kriminal o ba kaha mga aktibidad sa ilegal sa druga pinaagi sa Hotline Number 09197485024. (Wenz G. Mendoza)