DOH7 miisa sa alert level labot sa Mpox

Giisa sa Department of Health (DOH) Central Visayas ang alert level sa surveillance sa Monkeypox ug hugot nga nagbantay alang sa posibleng bag-ong mga kaso.

Giawhag sa mga opisyal sa DOH 7 atol sa usa ka press statement niadtong Martes, Hunyo 3, 2025, ang publiko nga magpabiling alerto ug hugot nga sundon ang mga pamaagi sa kaluwasan aron malikayan ang pagkatag sa makatakod nga sakit nga gitawag og Monkeypox.

Si DOH 7 Director Joshua Brillantes nanawagan sa tanan nga magpabiling kalmado ug giawhag ang publiko nga wad-on ang kahadlok sa mga tawo nga adunay Mpox.

Nanawagan siya sa publiko nga motuo lang sa ipagawas nga impormasyon sa DOH ug magmabinantayon sa mga lihok.

“We want to reassure the people of Central Visayas that the health system is on alert and prepared to respond. Our priority is early detection, clear communication, and protection of every individual, especially those who may be more vulnerable,” matod ni Brillantes. 

Gitaho sa SunStar Cebu niadtong Lunes, Hunyo 2, nga unom ka kaso sa Mpox ang nakumpirmar sa Central Visayas sukad Enero 2025.

Dunay tulo ka kaso ang natala sa Cebu City, samtang ang Mandaue City, Talisay City, ug Lapu-Lapu City tag usa ka kaso.

Lima sa mga pasyente ang nangaayo apan usa ang namatay nga na-record sa Talisay City.

Si Talisay Mayor Samsam Gullas niklaro hinuon nga ang namatay nga pasyente dili tungod sa Mpox apan nakomplikado sa ubang kondisyon sa panglawas ug huyang ang immune system.

Pagkatag, Paglikay

Sumala sa DOH, ang Mpox kasagarang makita sa panit o samad sa mucous nga molungtad og duha ngadto sa upat ka semana.

Kini nga mga sintomas sagad giubanan sa hilanat, grabeng kakapoy, nanghubag nga lymph nodes, ug kasakit sa ulo, kaunoran, ug likod.

Ang Mpox isip usa ka makatakod nga sakit, mahimong mapasa pinaagi sa dug-ol nga pag-istoryahanay, paghalok, paggakos, paghikap, o sexual contact.

Ang virus mahimo sab nga mapasa pinaagi sa pagtapot sa mga sanina o beddings.

Gipahinumdoman sa DOH ang publiko nga manghunaw kanunay sa mga kamot, tabunan ang baba ug ilong kon mag-ubo o mangatsi, ipabilin ang maayong bentilasyon sa sulod sa balay, ug likayan ang suod nga kontak sa bisan kinsa nga nagpakita og mga sintomas sa Mpox.

Bisan kinsa nga makasinati og mga sintomas sa Mpox gitambagan nga moduol dayon sa labing duol nga health center o mokontak sa Regional Emergency Operations Center hotline sa #0711, 09451576004, o 09435683298. / DPC