‘Discipline zone’ sa Banilad Road giplanohan pagsulbad

Ang dalan sa Banilad gikatakdang mahimong usa ka “discipline zone,” usa ka lakang nga gikonsiderar ni Cebu City mayor-elect Nestor Archival aron mahuwasan ang kahuot sa trapiko.

Gihisgutan ni Archival kini nga inisyatibo human sa iyang pagpanumpa niadtong Mayo 30, 2025, atubangan sa mga opisyales sa Cebu News Coop Multipurpose Cooperative.

Sa usa ka Facebook post sa public information office sa Siyudad, giingon nga malagmit ipahibalo ni Archival ang iyang mga plano alang sa Banilad Road atol sa iyang inaugural address karong bulana.

Gipahayag ni Archival nga ang nag-unang rason niini mao ang pagpagaan sa ka­nunay nga kahuot sa trapiko sa maong dapit, ilabi na sa Gov. M. Cuenco Avenue.

Matod sa mayor-elect, ang “discipline zone” magdili sa pagparking nga walay pili sa mga sakyanan ug motorsiklo.

Kinahanglan usab nga hingpit nga mosunod ang mga motorsiklo sa ilang “dedicated lane” ug gidili ang pag-waving sa trapiko.

Gipahayag sa mga motorista ang ilang suporta sa mga plano sa mayor-elect, nga nag-ingon nga kung mapamatud-an nga epektibo kini, kinahanglan nga ipatuman ang plano sa tibuok siyudad.

Si Justine Surabilla, nga moagi sa dalan labing menos lima ka beses sa usa ka semana sakay sa iyang awto, miingon sa SunStar Cebu sa usa ka interbyu niadtong Dominggo, Hunyo 1, 2025, nga ang plano mahimong epektibo kung husto og hugot ang pagpatuman sa balaod.

Si Irvin Grigor Adrales, laing motorista nga kada adlaw moagi sa dalan, miingon niadtong Dominggo nga maayo ang plano sa mayor-elect.

Iyang giangkon nga daghan ang mga sakyanan nga mag-park sa daplin sa dalan.

Gipunting usab ni Adrales nga ang mga pampublikong sakyanan sama sa mga jeepney dali ra’ng makahunong bisan asa sa dalan kon adunay mosakay nga pasahero.

“Dapat gyud siguro mo-tarong pud sila og butang og bus stops or mga jeepney stops para di magbara,” matud ni Adrales.

Dugang pa, ang mga delivery rider ug trucks mahimong restriktahan sa pagsulod sa lugar gikan sa alas 6 sa buntag hangtud alas 8 sa buntag.

Ang ilang mga hunonganan alang sa mga deliveries o pagdiskarga nakita nga nakatampo sa paghuot sa trapiko atol sa peak hours.

“Naglaum kami nga makapakunhod ug makapamenos sa trapiko. Apan kinahanglan pa siguro nga sulayan sa sunod nga mga semana,” matod ni Archival.

Giklaro usab niya nga himuon ang mga konsultasyon sa dili pa hingpit nga ipatuman kining mga kausaban, ug midugang nga bukas siya sa pagdawat og mga sugyot bahin sa plano. / JPS