Department of Agriculture, kalikagomda a kissayan ti angkaten ti pagilyan a karne ti baboy iti 60,000 metric tons

LAOAG CITY – Kalikagom ti Department of Agriculture (DA) a kissayan ti angkaten ti pagilyan a karne ti baboy iti 60,000 metric tons (MT) ita a tawen babaen iti panangpapigsa ti local pig production nga adda iti babaen ti P2.1 billion modified repopulation program.

Target ti ahensya a sukatan ti 10 percent iti imported pork ti pagilyan wenno 60,000 MT iti domestic output iti panagngudo ti tawen.

Plano ti departmento a gun-oden daytoy babaen iti panangpapintas ken panagpokus iti banner swine repopulation program wenno ti Integrated National Swine Production Initiatives for Recovery and Expansion (INSPIRE) program.

Nangisyu met ni Agriculture Secretary Francisco Tiu Laurel Jr. ti Memorandum Circular (MC) 28 para iti implementing guidelines iti programa a maawagan itan a Modified INSPIRE program.

Kunana a kasapulan daytoy para iti panangipatungpal ti estratehiya iti repopulation program, tapno magun-od ti target iti proyekto ken mapagtalinaed ti presyo ti karne ti baboy iti merkado.