Dati a Barangay Tanod, naarestar iti Anti-Illegal Drug Buy-bust Operation iti Brgy. Santiago iti ili ti Solsona

LAOAG CITY – Balligi a naarestar ti maysa a dati a barangay tanod babaen iti naiwayat nga Anti-Illegal Drug Buy-bust Operation iti Sitio Baltao West, Brgy. Santiago iti ili ti Solsona.

Segun ken ni Police Captain Randy Damo, Hepe ti Philippine National Police iti nasao nga ili, nabigbig ti suspek a ni Jensen Paul Andres y Lopez, agtawen iti 38, awanan asawa ken residente ti Brgy. Santiago iti ili ti Solsona.

Inbatadna a natiliw ti suspek kalpasan a naaktuaran a naglako ti maysa nga heat sealed transparent plastic sachet a naglaon ti maatap a shabu iti maysa a pulis a nagpammarang kas poseur-buyer.

Malaksid iti daytoy, kunana a naala pay manipud iti suspek ti pito nga heat sealed transparent plastic sachet a naglaon ti maipagarup a shabu nga agdagsen iti 0.5 grams nga agbalor ti siam a ribu a pisos pakairamanan ti maysa a ribu a pisos a nausar kas buy-bust money, maysa a pedaso ti cellular phone, maysa a pedaso ti cigarette foil, ti kurong-kurong a naglugananna ken ti 4,800 a pisos a personal a kuartana.

Innayonna a maibilang ti nasao a suspek kas Street Level Individual no sadino addan ti sumagmamano a bulan nga imonmonitorda daytoy.

Mainaig iti daytoy, basar iti suspek ket saanna a kukua dagiti mapapati nga iligal a droga a nakumpiskar kenkuana ken inadmitirna a nagusar daytoy ti maipawil a droga ngem nabayagen nga insardengna daytoy.

Kabayatanna, nakigtot ni Brgy. Chairman Renato Garcia ti Brgy. Santiago iti ili ti Solsona iti naisayangkat nga operasion nangruna ket dati nga adda iti babaenna ti suspek kas barangay tanod no sadino nagikkat isuna kas tanod gapu iti negosiona a dry goods.