Dagkong bato midahili sa Brgy Bala-as, Argao

Nabalaka ang mga residente ilabi na ang barangay opis­yal sa Bala-as, lungsod sa Argao, Lalawigan sa Sugbo ang pagdahili sa mga tipaka sa mga dagkong bato ug yuta sa kilid nga bahin sa Provincial Vegetable Highway.

Matod pa ni Kapitan Jo Ann Villafuerte sa Bala-as nga sa mga miagang adlaw inanay nga nangatagak ang mga dagkong bato sa dihang nasunod-sunod ang ting-uwan resulta sa nasinati nga dautang panahon dala sa bagyong Ferdie nga gisundan ni Gener ug karong bag-o misulod ang bagyong Helen. Bisan nga dili direkta nga naapektuhan ang Central Visayas nagdala kini og daghang uwan hinungdan sa pagkahumok sa mga kayutaan.

Usa sa gikabalak-an ni Villafuerte nga adunay indibiduwal ang matagakan sa pagpangligid sa mga bato.

Mihimo sab ang barangay og clearing operation aron sa paghawan sa kalsada. / DVG