Ben Madilynn
Nanawagan ang buhatan sa Commission on Elections (Comelec) sa Lapu-Lapu City sa tanang lokal nga mga kandidato sa eleksyon sa Mayo 2025 sa pagduso sa ilang Statement of Contributions and Expenditures (Soce) sa dili pa ang deadline.
Ang election officer sa Lapu-Lapu City nga si Atty. Ann Janette Lamban nisulti sa mga tigbalita sa usa ka interbyu nga ang lokal nga mga kandidato gikinahanglan nga mosunod sa deadline nga gitakda karong Miyerkules, Hunyo 11, 2025.
Matod ni Lamban nga ang mga kandidato nga mapakyas sa pagsumiter sa ilang Soce o usa ka financial document, diin ang mga kandidato mobutyag kon giunsa pagpundo ang ilang mga kampanya sa politika ug giunsa paggasto ang maong mga pundo, dili tugotan nga molingkod sa ilang posisyon.
“I will be requesting or calling the attention of all candidates, whether you win or you lose, please file your Soce before June 11,” asoy ni Lamban. Hangtod niadtong Lunes, Mayo 19, wala pa’y kandidato nga nibisita sa buhatan sa Comelec aron isumiter ang ilang campaign finance report.
Sumala sa Seksyon 14 sa Republic Act No. 7166, ang mga kandidato ug mga treasurer sa partido gikinahanglan nga mosumiter og usa ka tukma, ug itemized account sa tanang donasyon sa kampanya ug galastuhan sulod sa 30 ka adlaw human sa eleksyon.
Ang balaod naglatid nga ang pagkapakyas sa pagsumiter sa gikinahanglan nga financial report usa ka administratibong kalapasan, nga adunay multa gikan sa sa P1,000 hangtod P30,000 alang sa unang kalapasan, ug P2,000 ngadto sa P60,000 alang sa ikaduhang kalapasan.
Ang balikbalik nga makalapas mahimo usab nga permanente nang dili tugotan nga makalingkod sa puwesto.
Dugang pa, ang Omnibus Election Code nagpahamtang og estriktong mga silot sa mga kandidato nga sobra ang gasto atol sa kampanya, lakip ang usa ngadto sa unom ka mga tuig nga pagkabilanggo, diskwalipikasyon gikan sa publikong opisina, ug ang pagkawala sa mga katungod sa pagbotar.
Ang Soce gikinahanglan sa mga kandidato aron opisyal nga makalingkod sa katungdanan gawas sa pagpanumpa sa katungdanan ug pagdawat sa certificate of proclamation. / DPC
Source: Comelec Lapu-Lapu mipahinumdom sa mga kandidato
