Mario Bautista
Saanen nga interesado ni Commission on Elections Chairman George Erwin Garcia nga agipila ti kaso kontra ken ni Sagip party-list Rep. Rodante Marcoleta a nangakusar kenkuana nga addaan iti binilyon a pisos a naipan iti offshore accounts.
Segun ken ni Garcia, ipaimana laengen iti Dios iti naaramid kenkuana.
Impaganetgetna a ti napateg kenkuana ket agtalinaed a nadalus iti naganna ken integridad iti Comelec nupay adda ti demolition job kontra iti komisyon.
Idi napan a bulan ket plano ni Garcia nga ipila ti ethics complaint kontra ken ni Marcoleta kalpasan ti mapapati a panangibagana nga adda naideposito iti account ni Garcia bayat iti panaggatang iti Comelec ti automated election system manipod South Korean firm Miru System.
Inlibak met ni Garcia ti alegasyon ket kiniddawna iti National Bureau of Investigation ken Anti-Money Laundering Council a kitaen ti mapapati nga offshore accounts-na.
