Ben Madilynn
Nipadayag og suporta ang Cebu City Human Resource and Development Office (HRDO) sa gisugyot nga ordinansa nga nagtinguha sa pagdili sa mga empleyado sa City Hall sa pagpahulam og salapi ug pag-discount og cheque .
Kining pag-endorso nagsilbeng tubag sa gi-draft nga ordinansa ni Konsehal Jocelyn Pesquera, nga gipasa ngadto sa HRDO sa niaging session sa konseho.
Usa ka public hearing ang gikatakda karong Mayo 28, 2025 kabahin sa gisugyot nga ordinansa sa dili pa kini mopadayon sa ikatulo nga pagbasa ug final approval.
Ang ordinansa gitumong sa pag-amendar sa Seksyon 3, 6, ug 14 sa City Ordinance 2142, nga naila sab nga Ordinance Enacting the Code of Ethics of Cebu City Employees.
Si Henry Tomalabcad, pangulo sa HRDO, sa usa ka suwat nga gisumiter sa Konseho sa Siyudad atol sa ilang regular nga session niadtong Miyerkules, Mayo 21, 2025, nipadayag nga ang gisugyot nga ordinansa makapugong sa mga empleyado sa City Hall sa pag-apil sa mga binuhatan nga giisip nga “mapahimuslanon.”
“The said amendment may protect Cebu City Government employees from usurious transactions reducing the take-home pay of employees,” tipik sa suwat.
Dihang gipangutana bahin sa pagkuyanap sa money lending sa City Hall, si Pesquera, pinaagi sa usa ka text message niadtong Pebrero 16, 2025, niingon nga nakadungog siya og pipila ka mga estorya bahin sa isyu.
Ubos sa gisugyot nga mga silot alang sa bisan unsang kalapasan sa ordinansa, ang usa ka empleyado pahamtangan og 10 ka mga adlaw nga suspensyon alang sa unang kalapasan, 15 ka mga adlaw sa ikaduhang kalapasan, ug direkta nga pagkatangtang gikan sa serbisyo alang sa ikatulo nga kalapasan. / JPS
Source: Cebu City Hall uyon satinguha nga ipa-undang ang lending
