CCPO nakapasar sa 3-5 minute response time challenge ..

MALAMPUSONG nakapasar ang Cebu City Police Office (CCPO) sa hagit sa media pagtubag sa alarma sulod sa 3 hangtod 5 minutos, usa ka bag-ong mando nga gitagal sa ilang bag-ong hepe sa PNP nga si Police General Nicolas Torre III. 

Gipakita ni CCPO Director Police Colonel Enrico Figueroa ang kaandam sa iyang mga personnel sa pagpakatap sa tibuok Siyudad sa Sugbo aron daling makaresponde sa bisan unsang insidente.

Aron masuta ang kapabilidad sa kapulisan, gihagit sa mga sakop sa media ang operation unit sa CCPO ubos ni Police Lieutenant Colonel Miguel Andeza. 

Nangita og lugar ang mga police reporter ug nagporma og senaryo sa Dalan J. Panis sa Barangay Banilad, lugar nga layo sa sentro sa siyudad.

Gitawagan ang hotline sa CCPO, ang 09164439961, ug gipahibalo ang City Tactical Operation Center (CTOC) nga adunay armado sa maong dapit. 

Ang CTOC ni-dispatch dayon sa tanang unit nga anaa sa kalsada. 

Ang tanang lihok pagtubag sa alarma gi-live broadcast sa tagsa-tagsa ka Facebook account sa mga reporter aron makita sa publiko ang kaandam sa kapulisan pagtubag sa 5-minute response time.

Sulod lang sa 3 minutos ug 15 segundos, unang naabot ang Mobile Patrol Unit (MPU) nga naka-stationary duol sa simbahan sa Mabolo. 

Gisundan dayon kini sa ubang unit sama sa Tactical Motorcycle Riding Unit (TMRU) ug Special Weapons and Tactics (SWAT). / AYB