Ben Madilynn
Ningbangon gikan sa 15 puntos nga pagkalubong ang Indiana Pacers aron putlon ang 12 ka sunodsunod nga kadaugan sa hosts Cleveland Cavaliers, 108-93, sa Lunes, Enero 13, 2025 (PH time), sa National Basketball Association (NBA).
Gawas lang sa usa, tanang mga magduduwa sa Pacers nga ningpakita og aksiyon nakatampo sa opensa pinangulohan ni Andrew Nembhard kinsa nimugna og 19 puntos.
Ang Pacers ningkumbati sa tibuok 2nd half nga wala ang usa sa ilang labing mga sinaligan nga si Tyrese Haliburton kinsa nibiya sa duwa human naangol (hamstring tightness).
Gipasabot ni Nembhard nga ilahang natapakan ang dakong haw-ang nga nabiyaan ni Haliburton pinaagi sa ilang depensa.
“We were connected on defense,” matod ni Nembhard. “We didn’t fool around, even when we made mistakes, we helped out each other, and just made the next play.”
Naggukod og 15 puntos ang Pacers sa halftime, 34-19, apan human niini, ningbulhot ang ilang opensa sa 3rd quarter diin ilang gidominar sa hinakutay og puntos ang Cavaliers, 37-18.
Wala na ningbugnaw ang kainit sa opensa sa Pacers ug hingpit na nga ningbahar ang duwa sa Cavaliers.
“What disappointed me was, in the first half we were phenomenal defensively, and in the second half we just fell off,” matod ni Cavaliers head coach Kenny Atkinson.
“We couldn’t sustain our defense. The shots — we live with days like that, nights like that, but just disappointed (with) our defensive mindset in that third quarter and really the whole second half.”
Mao kini ang labing unang higayon sa season nga wala nakaabot og 100 puntos ang Cavaliers.
“It happens, 82 games in a season is super long,” matod ni Darius Garland kinsa maoy nangulo sa Cavaliers pinaagi sa iyang 20 puntos.
“Some days you have one of these games. I mean, we went an entire month without a loss, we were due for one.”
Aduna pa’y laing lima ka magduduwa ang Pacers nga nakamugna og dobleng numero nga puntos. / AP
